Festivál Nasionál Desportu 2026 sei hala’o iha 29 Novembru-07 Dezembru

DILI, 17 Novembru 2026 (TATOLI)—Prezidente Interinu Komisaun Organizadora ba eventu Festivál Nasionál Desportu (FND) 2026, Afrânio Amaral, informa enkontru ohin hamutuk ho komisaun komunikasaun nian atu koordena ho mídia sira oinsá halo kobertura másimu ba eventu Festivál Nasionál Desportu ne’e.
“Enkontru ida ohin hamutuk ho komisaun ba komunikasaun nian, atu koordena ho midia sira oinsá halo kobertura másimu ba eventu FND ne’e, ami ko’alia oinsá parte komunikasaun bele komunika ho Sekretária Estadu Komunikasaun Sosiál (SEKOMS) hodi buka fatin ida tau mídia sentre atu mellora kobertura ida-ne’ebé másimu ba eventu ne’e,” Afrânio Amaral hateten ba Agência TATOLI, ohin.
Nia hatutan, eventu ne’e komisaun organizadora tenke fó sai ba ema hotu asesu liuliu sira-ne’ebé iha suku no aldeia sira iha área remota.
“Ita-nia hakarak eventu ne’e tenke fó sai ba ema hotu asesu liuliu sira-ne’ebé iha suku no aldeia sira iha área remota,” nia dehan.
Nia hateten, abertura ba modalidade haat sei hahú uluk mak hanesan futeból, basketból, voleiból no futsál, ba feto no mane. Atividade hotu sei ramata iha loron 07 fulan-Dezembru 2026.
Munisípiu 12 Partisipa, Modalidade 13
Nia hatutan, festivál ne’e envolve modalidade hamutuk 13 ne’ebé nia orsamentu mai husi Ministériu Juventude Desportu Arte no Kultura.
Kompetisaun FND-FDP 2026 sei partisipa husi Munisípiu 12, inklui RAEOA no Ataúru.
Objetivu jerál husi Festival Nasionál Desportu no Festival Desportu Paralimpiku mak atu mellora moris saudável nasionál, envolvimentu sosiedade, koezaun sosiál liuhusi partisipasaun ne’ebé luan no profesionalizasaun desportu nian.
Modalidade 13 mak sei kompete:
Modalidade husi FND mak hanesan Futeból, Futsal, Voleiból, Basketból, Boxe Amadora, Taekwondo, Karate-do, Badminton, Ténis Meza, Hana Kalik.
Modaliade husi FDP mak hanesan Para Atletizmu, Para Xadrez, Para Ténis Meza.
Kalendáriu Kompetisaun
Maski abertura sei hala’o iha loron 29 Novembru 2026, maibé jogu husi modalidade haat (4) hanesan Voleiból, Futeból, Basketból no Futsal sei hahú dahuluk.
Voleiból hala’o tiha ona technical meeting iha loron 12 Novembru no sei hahú kompetisaun iha loron 15 Novembru.
Basketból sei hala’o technical meeting iha loron 14 Novembru no sei hala’o kompetisaun iha loron 15 Novembru.
Futeból sei hala’o technical meeting iha loron 14 Novembru no sei hala’o kompetisaun iha loron 17 Novembru 2026.
Futsal sei hala’o technical meeting iha loron 14 Novembru no sei hala’o kompetisaun iha loron 15 Novembru 2026.
Modalidade sira seluk, balun sei hala’o depoisde abertura no kalendáriu sei distribui sai ba públiku husi Komisaun Organizadora FND-FDP 2026 iha tempu badak.
Jornalista : Hortêncio Sanchez
Editór : Cancio Ximenes

