DILI, 28 Fevereiru 2026 (TATOLI)—Komisaun Funsaun Públika (KFP) hasai ona sirkulár ba liña ministeriál sira atu kumpre dekretu-lei foun númeru 3/2026 kona-ba rejime kontratu termu sertu iha administrasaun públika.
Komisáriu KFP ba Asuntu Planeamentu Forsa Traballu, José Telo Soares Cristovão, hateten dekretu-lei foun ne’e foka ba ajustamentu salariál ba ajente administrasaun públika, kazuál, rejime jerál no asesór sira ne’ebé tama ho kontratu termu sertu.
Lejizlasaun ne’e nu’udar kontinuasaun no atualizasaun husi dekretu Governu númeru 6/2015 ne’ebé halo ona husi Governu anteriór ho diskusaun naruk foin hetan aprovasaun iha Fevereiru 2026 ne’ebé promulga ona husi Prezidente Repúblika hodi halo ajustamentu ba saláriu no vensimentu hodi implementa hahú iha fulan Marsu ne’e.
“Agora Komisaun hasai ona sirkulár ba ministériu hothotu, tanba tuir lei loron 30 nia laran, tenke halo ajustamentu, iha prosesu ne’e finansa atu halo pagamentu ba sira-nia saláriu, tenke hetan uluk informasaun husi KFP, la kumpre sei la halo pagamentu,” nia katak liuhusi Programa Entrevista Eskluziva TATOLI, Matauro, Sábadu ne’e.
Notísia relevante : Deputada sira husu rezolve pagamentu saláriu désimu terseiru ne’ebé atrazu
Nia esplika, halo ajustamentu saláriu tenke bazeia ba esperiénsia serbisu no kualifikasaun akadémika. No orienta ba instituisaun sira tenke analiza funsaun atu kontrata ema ida atu mai halo no prodús saida ba instituisaun hodi selu tuir valór saláriu ne’ebé iha.
Ihaa ministériu lubun mak mai ona KFP hodi halo konsultasaun ba ajustamentu ne’e no parte KFP nafatin monitoriza atu kumpre implementasaun rejime foun ne’e.
Komisáriu ne’e hateten, rejime foun ne’e la aplika ba Institutu Públiku no Empreza Públika sira nune’e atuálmente uza nafatin dekretu-lei númeru 92/2022.
KFP ho Ministériu Finansa (MF) daudaun ne’e diskute hela atu regula no ajustamentu saláriu, ne’ebé iha tempu tuir mai sei lori ba Konsellu Ministru iha tempu badak.
KFP no MF atu halo ajustamentu ba saláriu ne’e hanesan parte ida husi Reforma Administrasaun Públika.
Jornalista : Nelson de Sousa
Editora : Julia Chatarina
