DILI, 12 Janeiru 2026 (TATOLI)-Deputada husi Partidu Libertasaun Populár (PLP), Ermenegilda da Costa Laurentina, husu ba Governu atu fó solusaun ba pagamentu saláriu désimu terseiru ne’ebé atrazu ba funsionáriu públiku balun ne’ebé seidauk simu sira-nia direitu.
Deputada ne’e hateten katak foin lalais funsionáriu balun hato’o sira-nia preokupasaun, tanba la simu sira-nia saláriu désimu terseiru. Nia subliña katak pagamentu ida-ne’e iha objetivu atu halo kontente funsionáriu iha tinan nia rohan, maibé mosu fali problema.
“Tanba sá, saláriu désimu terseiru ne’ebé nia objetivu atu halo kontente ema iha fin do ano, mosu fali protesta. Ida ne’e falla iha jestaun”, nia kestiona iha reuniaun plenária Parlamentu Nasionál, ohin.
Iha plenária ne’e, deputada husi Partidu Frente Revolusionária Timor-Leste Independente (FRETILIN), Sanchia Paixão Bano, mós hatudu nia preokupasaun no konsidera katak kestaun referida presiza solusiona.
Enkuantu, deputada husi Partidu Kongresu Nasionál Rekonstrusaun Timorense (CNRT), Cedelízia Faria dos Santos, klarifika kona-ba Lei Enkuadramentu Orsamentál katak maski Orsamentu Jerál Estadu (OJE) taka ona, maibé lei permite atu halo pagamentu até 15 Janeiru, bainhira orsamentu tama ona iha kompromisu.
“Ida ne’e mak loos. La’ós ita taka ona iha 31 Dezembru 2025, ita labele halo pagamentu ona. Lei dehan se bele halo pagamentu até 15 Janeiru”, nia esplika.
Prezidente Komisaun C ne’ebé trata Asuntu Finansa Públika ne’e hateten, tuir planu, Komisaun sei bolu, iha semana oin, Ministra Finansa no jerente Banku Nasionál Komérsiu Timor-Leste (BNCTL, sigla portugés) hodi halo esplikasaun ba kestaun referida.
Reasiona ho kestaun ne’e, Ministra Finansa, Santina Cardoso, hateten saláriu désimu terseiru negativu iha ministériu balun ne’e, Ministériu Finansa iha fulan-Outubru no Novembru 2025 notifika ona instituisaun sira.
Governante ne’e esplika katak saláriu negativu ne’e tanba instituisaun sira iha Janeiru tinan kotuk fó remunerasaun boot kedas ka rekruta ema barak, maibé atu labele negativu maka hapara tiha iha fulan balun iha Outubru ka Novembru no ida-ne’e mak daudaun instituisaun sira aplika.
Notísia relevante: Ministru Interiór promete sei rezolve funsionáriu DNPPP nia saláriu
Razaun seluk mak mosu saláriu negativu tanba hatama proposta ba Komité Revizaun Orsamentu ko’a. “Ha’u komprende hotu-hotu hakarak halo buat hotu-hotu, maibé ita mós hatene katak ne’e osan povu nian, no osan públiku nian, ita tenke hala’o ho transparénsia ho akuntabilidade, ho responsabilidade”, dehan.
Relasiona ho kestaun ne’e, Konsellu Ministru, iha reuniaun estraordináriu segunda-feira ne’e, analiza dadus ne’ebé Ministériu Finansa aprezenta kona-ba prosesu regularizasaun ba pagamentu saláriu désimu terseiru tinan 2025 nian.
Iha sorumutu ne’e, deside hasai ka ka foti millaun $4,5 husi Orsamentu Jerál Estadu (OJE) 2026 hodi halo pagamentu estraordináriu (ba saláriu 13°) no saláriu negativu (mensál) hahú husi Outubru to’o Dezembru 2025.
Notísia relevante: KM deside hasai millaun $4,5 husi OJE 2026 fasilita pagamentu estraordináriu
Jornalista: Arminda Fonseca/Nelson de Sousa
Editora: Maria Auxiliadora
