DILI, 30 Dezembru 2025 (TATOLI)–Ministru Interiór, Francisco da Costa Guterres, hateten, Ministériu Interiór (MI) sei rezolve problema funsionáriu husi Diresaun Nasionál Protesaun Patrimóniu Públiku (DNPPP) nia saláriu.
Funsionáriu sira husi DNPPP iha Tersa (30/12) ne’e halo asaun protesta hasoru Ministru Interiór tanba la satisfaz ho situsaun sira ne’ebé mosu iha Diresaun ne’e rasik hanesan osan ba alimentasaun no transporte, ne’ebé iha fulan-Dezembru tama tarde inklui saláriu 13o iha fulan ne’e.
“Sei selu imi-nia direitu husi saláriu alimentasaun ne’ebé falta fulan-ida, ne’ebé sei selu hotu. Imi lalika preokupa, imi fiar ha’u, ita sei rezolve hotu lalais,” Governante ne’e hato’o bainhira hasoru malu ho funsionáriu DNPPP iha resintu MI, Vila-Verde.
Notísia relevante : Governu aprova pagamentu estraordináriu ba Administrasaun Públika
Biban ne’e, Ministru kompromete sei rezolve problema referida no husu ba fusionáriu DNPPP atu kontinua halo serbisu.
“Importante imi serbisu ho kuidadu, imi-nia kontratu ne’e imi-nia direitu, sei la lakon, imi sei hetan filafali gaji tiga belas no to’o imi sei hetan hotu. Buat sira ne’e atrazu oituan tanba iha kestaun balun liliu tanba sae grau. Tanba ne’e buat sira ne’e afeta,” nia akresenta.
Tuir Ministru, saláriu ne’e direitu tanba ne’e funsionáriu sira presiza kontinua serbisu ho di’ak.
“Maibé imi sei iha direitu kona-ba ida-ne’e hotu. Imi fiar ha’u, imi fila bá serbisu ita sei hamutuk serbisu nafatin hodi hadi’a imi-nia buat sira ne’e hotu. Ha’u prontu responsabiliza, imi fiar ha’u. Ha’u sei responsabliza, ha’u sei la husik imi atu mate hamlaha, atu la simu imi-nia osan. Imi-nia direitu konta ho ha’u. Boas Festas Natál ba imi hotu,” nia katak.
Jornalista : Natalino Costa
Editora : Julia Chatarina
