Saláriu funsionáriu kazuál rihun ida-resin iha Oekusi sei simu iha Novembru
OEKUSI, 27 Outubru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu informa, pagamentu saláriu ba funsionáriu kazuál no termu-sertu hamutuk rihun ida-resin iha Oekusi, sei simu iha fulan-Novembru no sei simu bazeia tabela funsaun públika nian.
“Prosesu atu aprova pagamentu saláriu ba funsionáriu kontratadu termu-sertu prazu liu ona dezde 15 Outubru, nune’e iha fulan-Novembru maka foin bele prosesu ba pagamentu no simu retroativu rapela, husi Setembru, Outubru no Novembru,” nia hateten ba jornalista sira iha Oekusi, ohin.
Notísia relevante:Opsaun tolu rezolve saláriu funsionáriu kontratadu rihun ida-resin iha RAEOA
Autoridade ne’e esplika katak prosesu ajustamentu ba saláriu funsionáriu sira ramata ona, nune’e ba prosesu pagamentu ne’e, sei bazeia ba tabela funsaun públiku no dekretu-lei kona-ba nível saláriu termu-sertu.
“Durante ne’e alokasaun saláriu maioria ne’e la tuir tabela rua ne’e. Iha pontu rua, maioria saláriu baixu (tuun) maibé atu aplika tabela funsaun públika loloos sa’e, saláriu tuun tanba alokasaun saláriu vensimentu ba tinan-2026 ne’e, la sufisiénte (la to’o),” nia afirma.
Entaun ho reajustamentu ne’e, nia dehan, ekipa task-forse deteta katak, loloos funsionáriu kontratadu ida tenke simu $450,00 to’o $750,00, maibé defaktu saláriu tuun, entaun presiza halo sinkronizasaun, maibé iha funsionáriu balun, loloos simu direitu $1000,00, maibé simu fali $3000,00, ida-ne’e mós tenke hatuun.
“Agora iha opsaun rua de’it, sei saláriu la hatuun signifika la hetan vensimentu ne’e, prosesu ne’e hotu ona, bazeia orientasaun husi Entidade Tuteladu Superentende RAEOA, no Komisaun Funsaun Públika, ita halo tuir no ramata ona, ne’e maka funsaun públika rekomenda ona atu halo aprovasaun finál ba vairoment estruturál no nesesita duni vairament husi tetu orsamentu ne’e internu atu haforsa saláriu vensimentu hodi halo pagamentu” nia hateten.
Notísia relevante:Porsentu 25 husi OJE aloka ba saláriu funsionáriu públiku
Entretantu, tuir dadus fiskál ne’ebé aprezenta, alokasaun orijinál ba saláriu no vensimentu iha OJE 2026 RAEOA maka US$8.211.000.
Iha fulan-Maiu, Governu Sentrál aumenta tan US$2.000.000, inklui US$1.000.000 husi subsídiu Aero-Dili no US$1.000.000 husi Transferénsia Públika FED, ho aumentu ne’e, totál alokasaun sai US$10.211.000.
Husi totál ne’e, Prezidente Autoridade Régio da Cruz Salu, hateten katak husi US$8.000.000 gasta ona atu selu funsionáriu sira, enkuantu restu osan ne’ebé hela mak US$1.000.000.
Nune’e husi montante ne’e la sufisiente atu kumpre pagamentu funsionáriu kontratadu sira ba périodu Setembru to’o Dezembru 2026.
Jornalista: Abílio Elo Nini
Editór: Rafael Ximenes de A. Belo
