OÉ-CUSSE, 03 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) no Empreza internasionál Waskita Karya PT, kuarta ne’e diskute asuntu rua molok ezekuta konstrusaun estrada nasionál pakote I hosi Ponte Noefefan, sub-rejiaun Pante Makasar ba suku Suni-Ufe, sub-rejiaun Nítibe.
Prezidente Autoridade RAEOA, Arsénio Paixão Bano, informa autoridade hasoru malu ho ekipa téknika hosi Waskita Karya deskuti asuntu importante rua, atu prepara ekipamentu ba lansamentu no asina kontratu ba projetu estrada nasionál Ponte Noefefan ba Oénunu, pakote I ho distánsia kilómetru 16.
“Sorumutu ohin ne’e ita mós fó orientasaun, sira mós hato’o kestaun, kestaun ne’e mak rua de’it, ida bainhira ita halo lansamentu no asina kontratu, daruak bainhira ita hahú maibé sei iha problema akizisaun ba rai, maibé autoridade iha ekipa ona atu serbisu ba ida-ne’e. Ha’u fiar katak povu Oé-Cusse, liuliu suku Taiboko, Suni-Ufe no Lifau sei komprende tanba ita presiza estrada di’ak iha ita-nia rai,” Arsénio Paixão Bano, informa ba jornalista sira hafoin enkontru iha salaun Diresaun Rejionál Infraestrutura Oé-Cusse.
Nia orgullu tanba ekipa tékniku no basecamp hosi empreza to’o ona Oé-Cusse, nune’e sei serbisu hamutuk ho ekipa Diresaun Rejionál Infraestrutura (DRI), Unidade Téknika Akompañamentu ne’ebé tutela iha Gabinete Prezidente Autoridade no envolve mós Sekretáriu Rejionál Administrasaun no Terra Propriedade, kona-bá asuntu rai no plantasaun.
“Kaléndariu seremónia lansamentu máximu semana tolu, semana ida-ne’e sei kontratu, ita negosia loos hotu ona entaun ita bele prepara ba semana rua de’it ita bele hahú ona halo lansamentu, tanba ekipamentu to’o ona Oé-Cusse,” nia katak.
Jestór projetu hosi empreza Waskita Karya PT, Putu, garante konstrusaun ne’e sei konstrui ho kualidade atu fasilita povu Oé-Cusse hodi uza ba nesesidade moris nian.
“Ha’u reprezenta Waskita Karya, ne’ebé ami hein de’it asina kontratu, tanba ekipa tékniku sira prepara ona iha terrenu atu hahú ezekuta kontrusaun estrada, ami espera katak sei serbisu ho di’ak hatudu kualidade ba povu Oé-Cusse, ami prontu ona atu halo serbisu,” nia hateten.
Entretantu, konstrusaun estrada rurál ne’e ezekuta hosi empreza internasionál PT Waskita Karya, ho valór estimasaun kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 nian ho durasaun servisu durante fulan 22.
Jornalista : Abílio Elo Nini
Editór : Evaristo Soares Martins
