COVALIMA 10 Outubro 2022 (TATOLI) – Autoridade lokal iha postu administrativu Fohorem no Fatumea, munisipíu Covalima sei fasilita komunidade sira trata sertidaun RDTL. Tanba, populasaun ho idade avansadu la iha transporte atu ba munisípiu hodi trata sertidaun refere.
“Ha’u husu ba ita-bo’ot sira lori dokumentu mai de’it to’o iha suku, ami mak bele aprezenta lori ba iha munisípiu. Ita-bo’ot sira lori ba to’o iha munisípiu presija transporte no bainhira la iha família atu toba iha ne’ebé ida-ne’e sai preokupasaun bo’ot. Tanba ne’e, di’ak liu ita bo’ot sira mai iha suku. Hau sei foti formáriu atu itaboot sira preinxe iha suku,” hateten Xefi Suku Fohorem, Fernando Ferreira ba jornalista iha merkadu Fohorem.
Nia mós husu ba Ministériu Justisa (MJ) liuhosi Servisu Rejistu Notariadu atu koloka funsionáriu sira iha postu adminstrativu hodi fasilita komunidade trata dokumentu sertidaun RDTL.
Tanba, nia hatutan ferik katuas populasaun ho idade avansadu atu ba munisípiu presija transporte tanba ne’e di’ak liu funsionáriu sira halo atendementu iha postu administrativu no iha suku nune’e xefi aldeia bele ajuda ferik katuas sira ne’e.
“Ha’u nia rekomendasaun ba governu atu fasil ba komunidade, mak ita-bo’ot sira hakbesik an mai iha postu administrativu suku,” husu nia.
Nia hatutan tan, postu administrativu Fohorem iha nia suku Laktos, Fohorem, Dato-rua no Dato-tolu no husu ba funsionáriu sira bele halo atendementu ka lae iha suku laran. Tanba iha munisípiu tenke hein sertidaun atu simu besik semana rua nia laran.
Nune’e, Xefi Suku Belulik Leten, Quintino José Amaral mos hateten, nia parte servisu hamutuk ho ONG internasional Childfund distribui ona formulariu 100 ba xefi aldeia hodi fasilita komunidade rejistu sertidaun moris hodi hetan sertidaun RDTL.
Nia dehan, suku ne’e servisu hamutuk ho ONG internasional Childfund hodi fasilita komunidade sira rejistu sertidaun moris hodi hetan sertidaun RDTL, tanba haree ba distansia do’ok no kondisaun estrada.
Reprezentante inan aman , Joanina Afonso de Araújo reforsa, sertidaun RDTL hanesan dokumentu ida importante nudar sidadaun Timor-Leste (TL) tenke trata dokumentu refere. “Ita nu’udar sidadaun tenke trata dokumentu hodi halo rejistu sertidaun moris nune’e bele hetan oan sira nia sertidaun RDTL,” nia tenik.
Jornalista : Celestina Teles
Editor : Armandina Moniz
