DILI, 16 agostu 2024 (TATOLI)–Ekipa konjunta Sekretária Estadu Asuntu Toponímia no Organizasaun Urbana (SEATOU), sesta ne’e, muda vendedór sira halo negósiu iha Jardin Largo Lecidere hamutuk 71 ba merkadu Manleuana.
Sekretáriu Estadu Asuntu Toponímia no Organizasaun Urbana (SEATOU), Germano Santa Brites, hateten husi totál vendedór ne’e iha vendedór 35 de’it mak hakarak muda ba iha merkadu Manleuana, maibé restante ne’e hili atu halo negósiu iha sira-nia hela fatin.
“Planu muda vendedór sira-ne’e tinan ida resin ona no iha semana kotuk sira fó ona avizu ba negosiante sira-ne’e no peskadór sira. Vendedór sira ba merkadu Manleuana no peskadór sira ba hotu Bidau Santana nian. Lori bero no ankor sira ba hotu ne’ebá. Jardin Largo Lecidere husik livre atu jestaun merkadu bele halo servisu iha ne’e no evita problema iha ne’e,” Sekretaria Estadu Asuntu Toponímia no Organizasaun Urbana (SEATOU), Germano Santa Brites, hato’o ba jornalista sira iha Largo Lecidere.
Tuir planu, vendedór sira iha merkadu Elemleoi no no rotunda Comoro nian ne’e sei muda hotu ba iha merkadu Manleuana.
“Ida-ne’e fasil ba jestaun merkadu halo kontrolu no fó imajen di’ak ba iha fatin ne’e, bainhira ema liu bele sente anin fresku no goza sira-nia tempu feriadu no livre iha fatin ne’e,” nia hateten.
Nia garante, merkadu Manleuana iha merkadu provizoria ba iha ne’ebá ho medida rai ektare rua (2), maibé banhira se vendedor sira-ne’ebé la obedese desizaun Governu sei prega multa ba sira tuir regra ne’ebé iha.
Reprezentante vendedr sira, Vendedora Aurelia Guterres, ne’e durante tinan rua halo negósiu iha Jardin Largo Lecidere ne’e sente triste tanba bele muda ba iha merkadu Maneleuana, no nia tauk tanba bele ba iha ne’ebá ema barak no faan sasán ruma la folin.
“Ha’u sente triste, tanba ami faan iha ne’e movimentu di’ak. Agora muda ami ba merkadu Manleuana ne’e sasán folin ka lae. Ami faan etu no kafé iha, ema faan hotu ona. Ami triste tanba ami foti osan iha Kaebauk mak hodi halo negosiu,” nia dehan.
Nia dehan, husi rezultadu husi faan sira-ne’e mak sustenta família hanesan han, hemu no selu oan sira-nia eskola.
“Ami laran triste tebes, loro-loron ami hetan dolar ida ka rua, foti ami muda ba Manleuan ne’e dook tebe-tebes,” nia dehan.
Jornalista : Jesuína Xavier
Editór : Cancio Ximenes
