DILI, 04 dezembru 2024 (TATOLI)—Vise Primeiru-ministru, Ministru Koordenadór Asuntu Sosiál, Ministru Dezenvolvimentu Rurál no Habitasaun Komunitária, Mariano Assanami Sabino, husu ba Ministériu Saúde (MS) atu hadi’a fasilidade saúde sira, liuhusi kompleta ekipamentu médiku iha sentru kardíaku Lahane nune’e bele funsiona.
Assanami hato’o ida-ne’e, tanba agora daudaun edifísiu sentru kardíaku Lahane di’ak ona, maibé tenke iha fasilidade ne’ebé adekuadu.
“Ospitál iha Lahane ne’e di’ak, maibé ita presiza prienxe, tanba ne’e ita presiza integra buat importante tolu iha laran, dahuluk mak konstrusaun uma, ekipamentu médiku ne’ebé presiza atu hadi’a prátika modernu relasiona ho situasaun atuál, no seluk mak jestaun no rekursu umanu, tanba pakote tolu ne’e importante tenke organiza ho di’ak, nune’e ospitál ida bele funsiona ho di’ak,” Mariano Assanami Sabino, hateten iha Palásiu Cinzas Caicoli, ohin.
Nia dehan, fasilidade ba pesoál médiku sira mós importante tebes, tanba to’o oras ne’e, pasiente barak ne’ebé halo referál ba ospitál iha rai-li’ur hanesan Indonézia, Singapura no Malázia hodi halo tratamentu gasta ona osan barak, nune’e ho fasilidade ne’ebé adekuadu governu TL bele poupa liután.
“Tanba ne’e ba oin ita presiza hadi’a polítika, atendimentu di’ak liután, padroniza klínika sira, prátika no mós padroniza ambulánsia sira, tanba ne’e ita tenke hadi’a buat sira-ne’e,” nia friza.
Vise Primeiru-Ministru husu MS atu servisu hamutuk la’ós de’it hadi’a sistema saúde maibé hadi’a mós fasilidade saúde ne’ebé oras ne’e presiza.
“Tanba ne’e, Primeiru-Ministru husu ha’u atu kolabora ho Ministru Saúde hodi kaer sentru kardíaku Lahane, ne’ebé sei kontinua iha tempu-badak, liuliu kardiolojia no kankru, no ami hein katak sentru ne’e sei ramata iha tempu badak,” nia hatete.
Aleinde ne’e, Vise PM hein katak iha futuru, ospitál sira iha Maubise, Maliana no Baucau sei iha mós médiku espesialista ba korasaun no kankru, no seluktan, nune’e pasiente sira mós bele halo referénsia ba ospitál rejionál sira.
Jornalista : Felicidade Ximenes
Editór: Rafael Ximenes de A. Belo
