DILI, 04 Jullu 2026 (TATOLI)—Maktoban Pe. João Felgueiras nu’udar figura ida-ne’ebé sempre loke an hadomi ema hotu tanba ema domin-na’in liuliu iha devosaun boot ba Maromak liuhusi Sagrado Coração de Jesus.
Notísia Relevante: Padre João Felgueiras hakotu iis ho idade 105
Pe. Venáncio da Costa Pereira, husi Komunidade ka Kongregasaun Sejuíta, fó sasin katak nia parte deskreve maktoban hanesan nia patriarka ida, tanba nia ema katuas ne’ebé mak nia moris tomak fó ezemplu kona-ba Jesus nia vida.
“Ha’u gosta tebes nia tanba sempre inspira no motiva joven sira. Ha’u deskreve amu hanesan, ema ida-ne’ebé iha devosaun boot ba Maromak. Liuhusi devosaun Sagrado Coração de Jesus ne’ebé nia rasik sai promotór ba devosaun Sagrado Coracao de Jesus no Imaculada Coracao de Maria ne’ebé nia prova to’o nia mate,” Pe.Venáncio da Costa Pereira hateten ba jornalista sira iha Taibesi, sábadu ne’e.
Nia haktuir, iha sesta (03 Jullu 2026) horisehik, nu’udar loron festa ba Saun Tomé nian, no Pe. João mate duni iha loron ne’ebé primeira sesta-feira semana no fulan-Jullu ba Komunidade Sejuíta simu bensuan husi Santo Inacio de Loila, no nia iha devosaun boot ba Nossa Senhora do Carmo.
Entaun, nia hateten, fulan-Jullu ba parte igreja nian aleinde festa fulan santu Inacio Loila nian maibé mós ba fulan Nossa Senhora do Carmo nian fulan ne’ebé selebra mós Jesus nia raan kmanek, entaun adre mate loos iha loron ne’ebé nia mehi atu mate ba.
“Ha’u fó komuniaun ikus ba nia iha kinta-feira, nia la ko’alia ona. Maibé kuarta-feira nia sei ko’alia, fó hanoin ba ha’u kona-ba devosaun rua, devosaun ba Jesus nia Futar Fuan Santu no devosaun ba Na’in Feto nia Futar Fuan Sala Laek. Tanba, nia ema devosaun no Jesus nia amigu nia moris tomak to’o harii eskola Amigo de Jesus para Sempre,” nia dehan.
Nia haktuir, maktoban hanesan ema ida-ne’ebe mak hatene iha domin, hadomi ho maneira orijinál laiha falsifikasaun ka manipulasaun, hadomi ne’ebé puru, ida-ne’e mak bele deskreve nia.
“Ita hotu hatene Pe. João pesoál ne’ebé luta ba valór justisa, diginidade ema-nian, valór pás, rekonsiliasaun nian nomós valór demokrasia nian ho nafatin ba devosaun ne’ebé iha,” nia dehan.
Durante Pe. João nia moris tomak, nia laiha odiu no vingansa nia sempre loke an moris ho inklui ema hotu-hotu. Tanba nia pratika duni ninia moris ne’ebé mak dehan “Jesus iha ita-nia fuan no ita hotu iha Jesus nia Fuan”.
Obra ne’ebé nia husik mak nia vida tomak ba edukasaun, tanba edukar, Formar intelektualizar sivilizar mak bele halo ema sai ema liután, nune’e obra sira ne’e hahú husi eskola Amigo de Jesus.
Aleinde ne’e, durante maktoban nia moris, nia mós sai reitór espirituál iha semináriu menór, nia fó hanoin beibeik mai katak semináriu korasaun Timor-Leste nune’e duni, nia iha fuan ida ba ida-ne’e duni.
“Obra ne’ebé nia halo hanesan nia misaun ne’e mak hanesan Reitór, Profesór, akompandór, diretór espirituál sira-ne’e akumula hotu katak nia sempre involve nia an, iha mundu edukasaun, mundu formasaun mundu intelekualizasaun evanjelizasaun no sensibiliza ema obra ne’e mak husik hela ba eskola Amigo de Jesus. Ida-ne’e Sejuítas sei kontinua,” nia dehan.
Pe. João rasik sei hakoi iha tersa-feira (07 Jullu 2026), antes hakoi sei iha misa iha igreja Katedrál, Dili, iha mós sei iha nia família husi Portugál sei to’o aban ka segunda molok haloot.
Iha fatin hanesan, Ministru Negósiu Estranjeiru no Kooperasaun (MNEK), Bendito Freitas, hanesan sasin hateten amu iha tempu defisil funu sei kontinua nia fó ninia domin tomak ba Timór halo formasaun ba saserdote sira, líder sira no joven ba povu Timor tomak.
Bendito konta katak serbisu ida-ne’ebé maktoban fó konfiansa ba nia nunka haluha mak bainhira estudante timoroan sira iha tempu ne’ebé altura Governador Timor-Leste Mário Carrascalão haruka ba eskola iha rai-li’úr Indonézia, maktoban haruka nia prepara reflesaun jerál primeira leitura, segunda leitura no evangellu nian, kada kinta-feira tenke lori ba Koreiu nian hodi haruka ba estudante sira iha Indonézia ho objetivu atu sira mantein sira-nia morál, domin ba rai Timor.
“Memória barak, ita konta la hotu. Nia sempre eduka ami hodi kuda hametin kultura, domin rekonsiliasaun iha ami-nia moris no iha komunidade. Buat barak nia hanorin ami,” nia dehan.
Notísia Relevante: Ramos-Horta hato’o sentidu kondolénsia ba falesimentu Padre João Felgueiras
Jornalista : Arminda Fonseca
Editora : Cancio Ximenes
