Padre João Felgueiras hakotu iis ho idade 105
DILI, 03 Jullu 2026 (TATOLI)–Padre Jesuíta portugés ne’ebé dedika ninia moris tomak ba povu Timor-Leste, Padre João Vasconcelos Baptista Felgueiras, hakotu ona iis iha Dili Medical Center (DMC), iha sesta ne’e, tuku 17h30 lorokraik, ho idade 105.
Padre Roberto Madeira Encarnação, SJ, konfirma ba TATOLI katak Padre João Felgueiras hakotu ona nia viajen ikus iha DMC no atualmente padre sira seluk iha ona ospitál refere.
“Agora sei iha DMC no Padre sira seluk mos iha ona ne’ebá (DMC). Karik, informasaun di’ak liu mak sei bele hetan iha ne’ebá,” Padre Roberto dehan ba Tatoli, ohin.
Padre João Vasconcelos Baptista Felgueiras moris iha Caldas das Taipas, Portugal, iha 09 Juñu 1921. Nia tama ba Companhia de Jesus iha tinan 21 no simu ordenasaun saserdotál iha idade tinan 29.
Iha tinan 1971, Padre João mai Timor hodi okupa kargu hanesan Vise-Reitor Semináriu Dioseze Díli. Nia mós sai hanorin lian portugés iha Externato São José no forma barak husi intelektuál Timoroan sira, inklui antigu Primeiru-Ministru Rui Maria de Araújo.
Bainhira invazaun Indonézia hahú iha tinan 1975, Padre João deside hela nafatin iha Timor maski tenke moris iha vijilánsia husi autoridade Indonézia. Ninia dedikasaun ba povu Timoroan durante tempu okupasaun halo nia sai figura importante ida iha istória Timor-Leste.
Iha tinan 2006, Padre João hamutuk ho José Alves Martins públika livru Nossas Memórias de Vida em Timor, ne’ebé relata esperiénsia no akontesimentu sira ne’ebé akorre iha Timor-Leste husi tinan 1975 to’o periodu independénsia.
Durante ninia moris, Padre João simu kondekorasaun importante barak tanba ninia servisu ba Timor-Leste no Portugál, inklui Grande-Ofisial Ordem da Liberdade Portugal iha tinan 2002, Insígnia Ordem de Timor-Leste iha tinan 2009, no Grã-Cruz Ordem de Camões Portugal iha tinan 2022.
Padre João dala barak hateten katak nia hakarak hela no mate iha Timor-Leste, rai ne’ebé nia dedika ninia vida tomak hodi servi povu no Igreja.
Jornalista : Cidalia Fátima
Editór : Cancio Ximenes
