DILI, 21 Abríl 2025 (TATOLI)- Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, informa membru PNTL munisípiu Dili na’in 20-resin mak tama ona ba idade reforma.
“Ita identifika besik membru 20-resin mak tama ona iha reforma, na’in-15 mak saúde ladún di’ak tanba moras”, Komandante Orlando hateten ba jornalista sira iha nia kna’ar fatin Eskuadra Don Aleixo Komoro, segunda ne’e.
Nia hatutan: “Ita hato’o ona lista ba Komandu Jerál no CC ida mós ba iha ita nia Xefe Departamentu Saúde Komandu Jerál PNTL nian, nune’e bele halo tratamentu ba sira-nia saúde”.
Nia haktuir Departamentu Saúde Komandu Jerál PNTL agora daudaun iha programa vizita membru PNTL too iha sira-nia uma.
“Xefe Departamentu Saúde Komandu Jerál PNTL iha nia programa ida sempre halo monitorizaun ba membru PNTL ne’ebé moras”, nia afirma.
Orlando hateten daudaun Komandu PNTL munisípiu Dili iha membru efetivu 480.
Jornalista : Natalino Costa
Editora : Rita Almeida
