DILI, 17 Jullu 2025 (TATOLI)—Xefe Sentru Saúde Kelikai, Domingos Boavida informa Serbisu Saúde Sentru Saúde Kelikai oras ne’e hasoru difikuldade ba ambulánsia multifunsaun hodi halo atendimentu públiku ho urjentemente.
Domingos Boavida esplika mezmu administrativamente Kelikai hafahe ona ba postu tolu maibé iha área saúde sei konsentrada iha Postu Kelikai, nune’e enfrenta menus ambulánsia liuliu halo atendimentu urjénsia ba situasaun emerjénsia ne’ebé akontese iha suku 15 iha área Kelikai.
“Esforsu ne’ebé ami halo, karik kazu akontese iha postu tolu ne’e ho simultaneamente prezisa ambulánsia nia atendimentu, entaun ami koordena ho família pasiente bele tula ho transporte públiku bá asesu fasilidade saúde,” Xefe Sentru Saúde Kelikai hateten ba TATOLI via telefónema, Kinta ne’e.
Domingos hateten situasaun referida hato’o ba Ministériu Saúde no ministériu relevante promete sei solusiona ho fazeadamente.
Entretantu, Kelikai hafahe ona ba postu administrativu tolu kompostu husi Kelikai Antiga, Matebian no Kelikai, iha-ne’ebé kada postu iha suku lima husi totál suku hamutuk 15.
Jornalista: Natalino Belo
Editór: Xisto Freitas da Piedade
