KOVALIMA, 22 Setembru 2025 (TATOLI)-Servisu Munisípiu Agrikultura Kovalima liuhosi Departamentu Pekuária no Veterinária daudaun ne’e enfreta problema menúz estoke vasina ba virus raiva iha munisípiu Kovalima
“Totál vasina ne’ebé mak simu husi Diresaun Nasionál Veterinária hamutuk 1500 dosis. Husi númeru ne’e uja ona hodi halo vasina ba animál doméstika hanesan asu, busa no lekirauk hamutuk 744 no daudaun ne’e vasina ne’ebé restu iha armajén hamutuk 36 botir,” Xefe Departamentu Pekuária no Veterinária, Urbano Maria Tilman Suri, hato’o asuntu ne’e, ba TATOLI iha Edifísiu Tabakolot Kovalima, ohin.
Nia reforsa hosi estoke vasina restu botir 36 ne’e, nia parte liuhosi servisu tékniku sira sei bele utiliza hodi halo vasina ba animál haki’ak hanesan busa, asu no lekirauk hamutuk 360 iha postu administrativu Fatululik, Tilomar ne’ebé maka antes ne’e tékniku sira seidauk kobre.
“Objetivu husi vasina ne’e oinsá atu halo prevensaun ba virus raiva ba animál sira no mós minimiza kazu hada’et virus raiva rasik ba animál no mós ba ema liuhosi asu tata sidadaun sira,” nia hateten.
Tuir nia durante implementasaun programa ne’e la’o komunidade barak mak seidauk kontribui no koopera ho tékniku sira atu kesi sira-nia animal hakiák nune’e tékniku sira bele halo vasina ba animál hirak ne’ebé konsidera lori virus raiva iha munisípiu Kovalima.
Jornalista: Celestina Teles
Editór:Florencio Miranda Ximenes
