DILI, 24 Setembru 2025 (TATOLI)–Primeiru-Ministru (PM), Kay Rala Xanana Gusmão ho ninia omólogu malaiu, Anwar Ibrahim durante enkontru bilaterál afirma prinsípiu importante husi Malázia atu sai parseiru apoiante ne’ebé konsistente ba Timor-Leste nia dezaun ba Asosiasaun Nasaun Sudeste Áziatiku (ASEAN, sigla inglés).
Biban ne’e, PM Xanana hato’o agradesimentu kle’an ba PM Anwar, ho ninia apoiu maka’as no metin, ne’ebé fornese signifikadu partikulár, katak Timor-Leste sei sai membru ASEAN iha simeira ne’ebé sei realiza iha fulan-Outubru.
“Ho ida-ne’e ami rekoñese signifikadu husi Timor-Leste adere ba ASEAN durante Malázia nia mandatu nu’udar Prezidente, nune’e Malázia nia apoiu ne’ebé la nakdoko sei la haluha husi ita-nia povu,” Xefe Governu informa ba Jornalista sira, iha Palásiu Governu, Kuarta ne’e.
Aleinde ne’e, durante enkontru, parte rua mós troka hanoin kona-ba asuntu rejionál no globál sira hanesan iha Myanmar no iha biban hanesan reafirma importánsia unidade ASEAN no konsensu pontu lima nu’udar baze ba progresu ba pás no demokrasia.
“Enkuantu kona-ba Palestina, ami fahe lian hanesan hodi husu hakotu violénsia, respeitu ba lei internasionál no solusaun justu ida-ne’ebé rekoñese direitu povu Palestina nian ba autodeterminasaun,” PM Xanana akresenta.
Notísia relevante : PM Malázia reitera apoiu no elojia preparasaun TL atu sai membru ASEAN
Tamba ne’e, nia konsidera PM Anwar nia vizita hanesan amizade metin no loke pasu konkretu, ne’ebé sira konkorda ona atu foti no sei lori kooperasaun bilaterál nasaun rua ne’e besik liután.
Iha biban hanesan, Primeiru-Ministru Malázia, Anwar Ibrahim, afirma Malázia sei sai hanesan belun di’ak ba Timor-Leste hodi ajuda no tulun malu iha ASEAN nia laran.
“Klaru katak ha’u kontente tebes halo ona buat hotu ne’ebé posível atu aselera prosesu tanba kondisaun balun hanesan regra sira no Primeiru-Ministru sempre apoia maka’as iha emprendimentu ida-ne’e kumpre rekizitu hotu-hotu no ami sente kontente tebes iha Malázia atubele sai uma-na’in ba funsaun ne’ebé ofisialmente sei sai membru kompletu ASEAN nian no husi ne’ebá ami sei avansa hodi fó sai arranju barak seluk,” nia katak.
Hodi hatutan : “nivél konfiansa nian maka ha’u tenke dehan kuaze másimu ne’ebé inklui konetividade iha termu arranju defeza dijitál, aprovizionamentu, formasaun no fahe informasaun.”
Primeiru-Ministru Malázia, Anwar Ibrahim haktuir, molok ne’e Ministru Negósiu Estranjeiru no Kooperasaun, Bendito dos Santos Freitas hato’o ona konsensu pontu lima ne’e no pozisaun ASEAN nian, nune’e nia agradese ba ministru nia apoiu.
Xefe Governu malaiu katak, kona-ba nasaun Tailándia no Kamboja, sira bele asegura progresu balun iha termu sira ne’ebé laiha eskalasaun violénsia.
“Entaun ida-ne’e halo klaru ho apoiu husi nasaun sira ASEAN nian. Maibé iha frente internasionál, klaru ami forte hasoru hahalok a’at sira ne’ebé maka komete husi rejime Israel iha Gaza, Palestina no ita-boot derrepente ba faktu katak maski iha anúnsiu kona-ba rekoñesimentu, bombardeamentu no oho labarik sira, bebé sira, no feto sira kontinua nafatin,” nia hato’o.
PM Anwar nota, Timor-Leste iha ninia kompriensaun di’ak liu husi nasaun barak kona-ba luta.
Jornalista : Alexandra da Costa
Editora : Julia Chatarina
