DILI, 03 Dezembru 2025 (TATOLI)-Autoridade Inspesaun Fiskalizasaun Atividade Ekonómika Sanitária no Alimentár (AIFAESA, sigla portugés) no TradeInvest Timor-Leste realiza semináriu nasionál kona-ba “Reforma regulatória Timor-Leste haforsa oportunidade asesu ba merkadu rejionál iha Asosiasaun Nasaun Sudeste Aziátiku (ASEAN) no globál Organizasaun Mundiál Komérsiu (OMK)”.
Objetivu husi atividade ne’e hanesan apelu nasionál ida ba preparasaun, mudansa no progresu hodi hatán ba kompromisu Estadu Timor- Leste nia Pos-adezaun iha ASEAN no OMK.
Inspetora Jerál Autoridade Inspesaun Fiskalizasaun Atividade Ekonómika Sanitária no Alimentár, Odete Viegas, hateten tema ne’e interresante tebes tanba bainhira Timor-Leste sai ona membru ASEAN no OMK, nune’e hanesan servidór Estadu presiza ona prepara kondisaun hahú kedas husi lejialasaun to’o implementasaun katak saida mak presiza hadi’a no reforsa.
“Objetivu loloos atu haree ba papel entidade instituisaun públiku no empreza públika liga ho estatutu funsionáriu no lejislasaun ne’ebé mak presiza iha reforma no instituisaun hotu-hotu tenke hala’o nia papel hodi kontribui ba dezenvolvimentu ekonómia rai-laran,” Inspetora Jerál informa ba jornalista sira iha Hotel JL. World, Metiaut, ohin.
Infelizmente, nai dehan, AIFAESA realiza semináriu ne’e hamutuk ho TradeInvest Timor-Leste no oradór sira pertense husi entidade Governu hodi ko’alia kona-ba lejislasaun, sistema finanseira nomós dezenvolvimentu ekonómia.
Enkuantu semináriu ne’e sei realiza durante loron rua hahú husi ohin loron to’o aban, no partisipante kompostu husi entidade Governu, operadór ekonómikus no estudante universitáriu sira.
Aleinde iha semináriu AIFAESA mós realiza mini espozisaun hodi fó konesimentu fasilidade ne’ebé sira uza hodi halo inspesaun inklui produtu fraude sira ne’ebé AIFAESA rekolla.
Jornalista : Alexandra da Costa
Editór : Cancio Ximenes
