DILI, 03 Dezembru 2025 (TATOLI)—Tribunál Judisiál Primeira Instánsia Dili (TJPID), Kuarta ne’e, aplika Termu Identidade Rezisténsia (TIR) no Aprezentasaun Períodika (AP) ba asistidu na’in-hitu, ne’ebé envolve sunu uma ida iha área Markoni, Suku Fatuhada, Postu Administrativu Dom Aleixu, iha Domingu (20/11).
Defeza husi arguidu na’in-hitu, Defensór Públiku Sergio Quintas hateten, kazu ne’e iha arguidu hamutuk na’in-sia, maibé Tribunál aplika de’it medida koasaun ba na’in-hitu, enkuantu arguidu na’in-rua seluk hetan liberdade.
“Despaisu Tribunál nian ne’e aplika TIR ba arguidu na’in-hitu, enkuantu na’in-rua seluk tanba inputabilidade ho razaun idade minoridade. Entaun, sira laiha responsabilidade kriminál, tanba ne’e Tribunál liuhusi juís ne’ebé kaer Primeiru Interrogatóriu ne’e liberta sira,” Sergio Quintas hato’o ba Jornalista sira iha TJPID.
Ministériu Públiku (MP) liuhusi Prokuradór Domingos Barreto, durante iha prosesu interrogatóriu ba kazu ne’e promove ho krime danu agravadu no ofensas korporais simples ba arguidu sira.
Notísia relevante : Kazu Zizelma, Tribunál mantein aplika pena prizaun tinan-tolu ba arguidu
Maibé hafoin Tribunál halo identifikasaun ba arguidu na’in-sia, identifika katak na’in-hitu laiha indísiu forte ba prátika krime danu agravadu liga ho sunu uma, depois ho krime ofensas korporais simples.
“Kazu sei iha prosesu investigasaun hela, ne’ebé ita haree took ba oin Ministériu Públiku atu akuza krime saida ba sira, krime danu agravadu no krime ofensas korporais simples mak iha, tanba momentu ne’ebá konsege uma ida hetan sunu mais ou menus vítima na’in-rua mak hetan tuda husi ema deskoñesidu,” Quintas akresenta.
Kazu ne’e tanba iha momentu ne’ebá arguidu ida halo festa komemorasaun oan nia aniversáriu, nune’e konvida ema barak atu partisipa iha ne’ebá to’o momentu tuku 03:00 otl madrugada foin tuda malu akontese hodi rezulta kios ida hetan sunu no ema na’in-rua kanek.
Nune’e, bainhira Polísia to’o iha fatin akontesimentu, vítima na’in-rua bá ospitál depois dadeersan tuku 09:00 otl mak Polísia to’o fali fatin.
“Iha altura ne’ebá labarik ida ho idade 18 salva nia maun ne’ebé mak hetan tuda, Polísia to’o ba kaer hotu no sulan iha sela Polísia nu’udar arguidu. Tanba ne’e mak laiha indísiu forte prátika krime,” nia haktuir.
Maski nune’e, parte Defeza konkorda Tribunál nia despaisu tanba konsidera desizaun ne’e proporsionál no adekuada, ne’ebé nu’udar Fefensór defende sira perante julgamentu no sei la rekorre hasoru despaisu Tribunál.
Antes ne’e, hafoin akontesimentu, Polísia to’o kedan fatin akontesimentu no kaer kedan suspeitu na’in-sia ho inisiál RdC, RS, NAdTG, RX, HA, MAdS, AdC, JP, AdC hodi lori kedan ba sala Komandu PNTL.
Jornalista : Natalino Costa
Editora : Julia Chatarina
