DILI, 17 Dezembru 2025 (TATOLI)—Ministru ba Asuntu Kombatente Libertasaun Nasionál, Gil da Costa Monteiro “Oan-Soru” apela ba kombatente no família kombatente sira atu hatudu dokumentu komprovativu ba Diresaun Nasionál Pensaun Subvensaun (DNPS) hodibele asesu ba fixa pagamentu.
“Maluk veteranu no kombatente libertasaun nasionál sira inklui família sira-ne’ebé mak sai benefisiáriu ba pensaun veteranu tenke hatudu dokumentu komprovativu sira ba ekipa téknika sira tau marka tiha lai karimbu, hafoin lori bá banku ne’ebé sira loke konta-bankária bá, hodi halo levantamentu ba osan. Maibé, aprezentasaun ba dokumentu komprovativu sira-ne’e, tenke la’o tuir oráriu ne’ebé MAKLN liuhosi DNPS hasai ona hodi atende kada munisípiu sira,” Oan-Soru dehan ba jornalista sira iha edifísiu MAKLN, Komoro, Kuarta ne’e.
Oan-Soru dehan dokumentu komprovativu mak kópia fixa pagamentu, billete identidade (BI), kartaun eleitorál, sertidaun RDTL ka sertidaun batizmu no hatudu dokumentu orijinál ba banku ne’ebé kada kombatente asesu ba.
Governante ne’e subliña MAKLN la halo pagamentu direta maibé MAKLN prosesa dokumentu sira, hodi transfere osan tuir benefisiáriu sira-nia númeru konta-bankária no haruka bá banku sira mak sei halo pagamentu.
“Dahuluk, pagamentu la halo iha-ne’e (ministériu). Iha-ne’e atu mai foti dokumentu sira hodi hatudu dokumentu sira tuir dalan legál ne’ebé mak iha, katak dokumentu ne’e loos. Agora eziste tiha ona banku foun ida iha-ne’e, entaun iha-ne’e mós halo pagamentu. Más, la’ós Banco do Nosso Futuro de’it. Ema 15.697 ne’e fahe malu iha banku komersiál hotu-hotu iha Timor-Leste,” Ministru “Oan Soru” esplika.
Entretantu, MAKLN alokadu osan ba kombatente sira hamutuk 15.697, ne’e ho montante millaun $49-resin.
Prosesu levantamentu ne’e, disponivel iha banku komersiál hotu-hotu iha rai-laran, hanesan Banco do Nosso Futuro (BNF), Banco Nacional do Comêrcio de Timor-Leste (BNCTL), Banku Mandiri, Banku BRI, Banco Nacionál de Ultramarinho (BNU), Banku ANZ no selu-seluk tan, tuir konta-bankária ne’ebé kombatente sira asesu ba.
Aleinde ne’e, Ministru Oan-Soru dehan kombatente sira-ne’ebé seidauk, kontinua kompleta dokumentu, nune’e bele hetan mós direitu hanesan sira seluk. Sira-ne’ebé mak nia dadus foin lalais hetan reklamasaun no kontestasaun, sei halo hela validasaun iha munisípiu idak-idak no hein prosesu tuirmai.
Tuir prazu legál ne’ebé kalendariza ona, Governu sei halo pagamentu faze segundu nian iha 15 Fevereiru 2026 no pagamentu faze terseiru nian iha 15 Marsu 2026.
Jornalista: Osória Marques
Editór: Xisto Freitas da Piedade
