LAUTEIN, 12 dezembru 2025 (TATOLI)– Empreza estatál, Timor GAP,E.P, liuhusi kontratu ho Empreza Internasionál BJP, husi Xina, finaliza ona prosesu levantamentu dadus sízmiku iha bloku Pualaka ne’ebé lokaliza iha munisipiu tolu iha Kosta sul hanesan Manatuto, Manufahi no Viqueque, finaliza ona no sei kontinua tama iha faze analiza dadus, hafoin halo esplorasaun ka perfurasaun.
Prezidente Autoridade Nasionál Petróleu, Gualdino do Carmo da Silva, informa daudaun peskiza remata ona no na’in ba kontratu mak Timor Gap, halo ona analiza dadus sízmiku ho durasaun ba fulan-ualu, hafoin kontinua halo perfurasaun.
Notísia relevante:TIMOR GAP ho lia-na’in sira hala’o seremónia rituál antes lansamentu ba levantamentu bloku Pualaka
“Bloku pualaka, Timor GAP hala’o hela prosesu avaliasaun dadus sízmiku, finaliza mak entrega relatóriu ba Autoridade Nasionál Petróleu. Molok avansa ba halo perfurasaun, maibé tuir planu kontratu sira sei halo perfurasaun posu ida tinan oin”, dehan Prezidente ANP ne’e, hafoin halo lansamentu peskiza naun sízmiku iha Lospalos, munisipiu Lautein.
Nune’e, Nia hatutan, aprovasaun hotu ona no entrega ona ba Timor-GAP iha fulan-Novembru tanba ne’e Timor GAP hatama ona planu atu konfirma distribuisaun petróleu ne’e rasik, liuliu foku ba haree kalkulu ba volume, nune’e bele halo dezenvolvimentu ba perfurasaun.
“Perfurasaun iha bloku Pualaka, daudaun ne’e opsaun sei nakloke hodi haree petróleu ou bele mós gas no bainhira finaliza ona mak sei kontinua perfurasaun iha Pualaka ou iha fatin seluk,” nia esplika.
Entertantu lansamentu ba projetu sízmiku husi Primeiru-Ministru, Kay Rala Xanana Gusmão iha loron 11 Janeiru 2025 iha Natarbora, munisípiu Manatutu ne’ebé peskiza sízmiku kobre área kosta Sul liuliu kobre Munisípiu Kovalima, Manatutu no Vikeke.
Projetu sízmiku ne’ebé termina ona peskiza no ezekuta husi Timor- GAP, E.P liuhusi subsidiáriu hanaran Timor-GAP Pualaka block liuhusi kontratu ho empreza internasionál BJP husi Xina hanesan empreza boot liu iha mundu hala´o serbisu sízmiku.
Projetu 2D Seismic Acquisition, hanaran “Café” hanesan programa ida husi programa sira seluk iha kontratu fahe produsaun (PSC), PSC-TL-OT-21-17 nia laran. PSC-TL-OT-21-17 atribui ba TIMOR GAP Paulaca Block Unipessoal, Lda. (TGPB), subsidiáriu hosi TIMOR GAP, E.P., empreza mina-rai nasionál, nu’udar operadór úniku. Kontratu ne’e asina iha loron 7 fulan-dezembru tinan-2021.
Rekizitu esplorasaun iha períodu inisiál levantamentu FTG, Estudu imajen jeokímika Amplifikadu, no levantamentu sízmiku 2D. Levantamentu FTG ho totál 3.149 Lkms ho espasu liña 500m kompleta ona iha 13 Setembru 2022. Atu kumpre kompromisu sira ne’ebé asina hosi PSC, TGPB kompromete atu hala’o Café 2D Seismic Acquisition ho totál liña 266 LKM iha área kontratu nian. Levantamentu sízmiku ne’e importante hodi halo estimasaun ba totál volume hidrokarbonetu (PIIIP) ho integra dadus sísmiku, jeolojia no jeofíziku hodi identifika akumulasaun idrokarbonetu no determina lokalizasaun futuru postu esplorasaun.
Jornalista : Anito Soares
Editor : Florencio Miranda Ximenes
