ERMERA, 17 Dezembru 2025 (TATOLI)–Ain-le’ut funu nian sira husik hela, iha rai-rahun “tempu” ne’ebé duir-an ba oin nafatin. Maske dalaruma anin-fuik koko atu hamoos istória funu-nian, maibé memória nafatin kuida ho fiel. Iha mata-ween iha domin ne’ebé real, la’os katak buat hotu tenke rohan-laek atu iha iha folin, maibé dalaruma fahe malu mós fó hanorin kona-ba valór—valór ba istória ida-nian no valór ba moris ida-nian.
Ida-ne’e mak akontese ba Primeiru-Ministru, Kay Rala Xanana Gusmão, iha Kuarta (17 Dezembru 2025), hafoin fila husi viajen estranjeiru ba Indonézia, Xanana sama hikas nia ain-le‘ut ba Nunu-Tali, Ermera, hodi presta omenajen ikus ba Saudoza Armanda Araújo Arranhado “Hallima” (moris iha 13 Fevereiru 1954) ne’ebé hakotu iis iha Tersa, 16 Dezembru 2025.
Xanana to’o iha Ermera kuaze tuku 15h00, hanoin hikas memória funu nian iha Nunu-Tali, Xanana nia matan-ween turu iha nia hasan hanesan bee suli tuir Mota Bandeira, bainhira Xanana la’o tama neineik ba uma (Abrigu) ne’ebé uluk sai hanesan Xanana nia subar fatin, Xanana hamriik se liman hodi kaer fatin ne’ebé hatuur Saudoza Hallima nia mate-isin hodi hakruuk reza no tanis.
Hafoin hasa’e orasaun ba matebian Hallima, Xanana hako’ak metin Saudoza nia kaben, Veteranu Luis António Salsinha “Airmano Raikutun”, no oan sira hodi hamonu matan-ween ba dala ida tan, katak fahe malu mós fó hanorin kona-ba valór—valór ba istória ida-nian no valór ba moris ida-nian.
Iha tinan 1991, Xanana hala’o viajen husi Ponta Leste, Lospalos liu mai Viqueque, Bakcau, Manatutu, Ainaru to’o ba Ermera hodi subar iha Veteranu Luis António Salsinha no nia kaben, oferese kuartu simples hodi subar. Ba Xanana, Saudoza, hanesan feton ida-ne’ebé uluk kuidadu nia bainhira subar husi militar Indonézia sira.
Iha entrevista ho Jornalista, Saudoza nia Kaben, Luis António Salsinha hateten Durante nia moris Saudoza hanesan ema ida-ne’ebé la hakmatek iha uma de’it, sempre ativu iha asuntu familia, igreja no ba sosiedade to’o la haree ba kondisaun saúde.
“Dalaruma nia sente baruk hela hanesan stomagu, tensaun ne’e mós nia la interese. Ami kuandu akonsella dehan atu ba ospital, nia dehan imi lalika preokupa ho ha’u. Ha’u hatene saida mak ha’u atu konsumu, tanba nia mós konfia iha medikamentu tradisional sira,” Luis António haktuir ba jornalista sira, kuarta ne’e.
Luis António rekoñese Saudoza nia viajen moris nakonu ho dedikasaun, nune’e la sente triste ba nia mate maibé sente triste tanba saida mak Saudoza halo ona liuliu hahú kedas husi tempu libertasaun nasionál.
“Ha’u tanis ba nia la’ós tanba nia mate. Ha’u tanis ba nia tanba buat ne’ebé nia halo ha’u labele halo. Hanesan nia feto ida bele halo buat ida, Maun sira (Forsa FALINTIL) mai, nia fó perlindungan, nia ba servisu kapela, hanorin katekeze, nia katekista, apostuladu orasaun, nia bele halo buat ida-ne’e. Ha’u admira ida-ne’e, ida-ne’e mak halo ha’u tanis,” nia esplika.
Nia heteten, situasaun sai tiste liu ba familia tanba saudoza mate molok prosesu rehabilitasaun ba Abrigu Nunu-Tali ne’ebé apoiu husi AMRT (Arquivo & Museu da Resistência Timorense) remata.
Saudoza Armanda Araújo Arranhado “Hallima” hetan medalla kondekorasaun husi Estadu Timor-Leste no hanesan Veterana 8/14 grau 3 ba nia dedikasaun iha tempu funu, no hetan kondekorasaun husi Arqiodioseze Dili no hanesan Katekista no Leigu Canosiana, hodi rekonese servisu no kontribuisaun ba sosiedade.
Matebian ho nia Keben iha oan na’in-10 (mane tolu no feto na’in hitu), maibé oan mane boot fila uluk (mate) iha 21 Maiu 2025.
Tuir planu serimonia funebre sei hala’o iha loron 18 Dezemberu 2025 ho misa iha Kapela Humboe tuku 09h30 dadeer, hafoin sei lori hikas ba fatin dekansa ikus iha Abrigu Nunu-Tali, Humboe, Ermera.
Notísia Relevante: Xanana Tanis iha Nuntali
Jornalista : Cidalia Fátima
Editór : Cancio Ximenes
