Ekipa MAE avalia kondisaun Autoridade Vikeke ba desentralizasaun no podér lokál
VIKEKE, 15 Dezembru 2025 (TATOLI)—Ekipa avaliasaun husi Ministériu Administrasaun Estatál (MAE), Segunda ne’e, hahú halo avaliasaun ba Autoridade Munisípiu Vikeke kona-ba preprasaun ba desentralizasaun no podér lokál.
Koordenadór Ekipa Avaliadór husi MAE, Elviro Fernandes Moniz hateten realiza avaliasaun ne’e baze legál husi Ministru Administrasaun Estatál Nú. 40/MAE/12/2025 kona-ba estabelesimentu Komisaun Koordenasaun Atividade Avaliasaun Kondisaun Mínima iha munisípiu sira.
Objetivu jerál husi avaliasaun ida-ne’e, atu haree ka avalia nivel kapasidade administrativa iha autoridade munisípiu sira, avalia kapasidade finanseira, organiza asuntu finansa, kapasidade téknika operasionál kada autoridade munisípiu sira.
“Ho avaliasaun ne’ebé ami ohin halo durante loron ida-ne’e sei sai nu’udár baze ka referénsia hodi apoiu desizaun Governu nian hodi avansa ba iha desentralizasaun no podér lokál. Purtantu, atividade avaliasaun ida-ne’e mak deside futuru Autoridade Munisípiu Vikeke avansa ka la avansa ba podér lokál,” Elviro Fernandes Moniz hateten hafoin abertura avaliasaun kondisun mínima iha salaun Administrasaun Munisipál, Segunda ne’e.
Nia esplika avaliasaun ne’e halo entrevista hodi prenxe kestionáriu ne’ebé ekipa avaliasaun prepara ona. Tempu ba avaliasaun ne’e limitadu. Kada munisípiu ida loron ida.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, haktuir ekipa avaliasaun husi nasionál ne’ebé ohin dezloka mai munisípiu Vikeke hodi halo avaliasaun ba kondisaun mínimu ba desentralizasaun no podér lokál, ida-ne’e sai oportunidade ba Munisípiu Vikeke.
“Durante ne’e ita hotu hein, maibé ohin ekipa mai ona hodi halo avaliasaun. Avaliasaun ne’e diresaun sira sei partisipa másima iha prosesu avaliasaun ne’ebé ekipa avaliadór sira halo. Nune’e, ha’u husu diresaun sira tenke partisipa tanba ita hakarak ko’alia kona-ba preparasaun desentralizasaun no podér lokál ne’ebé sei atribui mai munisípiu,” nia akresenta.
Entretantu, partisipa iha abertura ba avaliasaun ne’e kompostu husi sekretáriu munisípiu, diretór munisipál sira, funisionáriu no ekipa avaliadór husi MAE.
Jornalista: Vitorino Lopes da Costa
Editór: Xisto Freitas da Piedade
