DILI, 18 Dezembru 2025 (TATOLI)—Servisu Nasionál Ambulánsia Emerjénsia Médika, Institutu Públiku (SNAEM, I.P.), Kinta ne’e, rejista kombatente na’in-sanulu (10) dezmaia durante forma simu fixa pagamentu iha edifísiu Ministériu Asuntu Kombatente Libertasaun Nasionál (MAKLN), Komoro.
Reprezentante ekipa SNAEM, Ana Paula haktuir benefisiáriu na’in-sanulu ne’e dezmaia tanba hamriik kle’ur, moras no balun hamlaha tanba hosi dook mak mai, maibé laiha ida mak grave.
“Hosi na’in-sanulu ne’e, sira na’in-hitu (7) rekupera ona, na’in ida sei iha fatin deskansa SNAEM nian no na’in rua lori bá Ospitál Nasionál Guido Valadares (HNGV-sigla portugeza) tanba presiza halo atendimentu ne’ebé urjente,” Ana Paula dehan ba TATOLI bainhira halo atendimentu ba moras sira iha edifísiu MAKLN.
Notísia relevante: Ohin, kombatente 15.697 simu fixa pagamentu atu simu direitu pensaun
Ana Paula dehan benefisiáriu na’in-sanulu ne’e maihosi Munisípiu Aileu, Ainaru no Baukau.
Antes ne’e mós (horisehik), Diretór Servisu Nasionál Ambulánsia Emerjénsia no Médikamentu, Institutu Públiku, Simplício Amaral hateten ekipa SNAEM evakua benefisiáriu tinan 2009 hamutuk na’in-hitu.
“Hahú iha loron 15 Dezembru ita evakua uluk benefisiáriu tinan 2009 hamutuk na’in-hitu tanba sira dudu malu no balun tanba loron manas halo oin halai,” Simplício Amaral tenik.
Nia hatutan bainhira benefisiáriu sira monu ne’e ekipa SNAEM halo kedas intervensaun ka halo atendimentu iha fatin akontesimentu.
Simplício informa benefisiáriu sira-ne’ebé monu ne’e balun grave, tanba sira idade hotu ona no balun mai la matabisu, entaun sira hetan moras no ekipa sira tau soru kedas hodi halo evakuasaun bá iha Sentru Saúde Komoro no balun ne’ebé mak grave transferida ba HNGV, más laiha mate.
Jornalista: Osória Marques
Editór: Xisto Freitas da Piedade
