DILI, 15 Dezembru 2025 (TATOLI)–Ministru Asuntu Kombatente Libertasaun Nasionál, Gil da Costa Monteiro “Oan-Soru”, hateten Ministériu Asuntu Kombatente Libertasaun Nasionál (MAKLN) esforsu halo pagamentu ba benefisiáriu hamutuk 15.697, maibé ohin ne’e sei simu uluk lai fixa pagamentu.
“Ohin ne’e benefisiáriu 15.697 mai simu fixa pagamentu hafoin bele simu sira-nia direitu iha banku sira iha territóriu. La’ós simu de’it iha nasionál maibé sira-ne’ebé iha konta bankária Banco do Nosso Futuro (BNF) bele simu iha-ne’e. Ohin loron ba simu fixa pagamentu de’it,” Ministru Oan-Soru dehan ba jornalista sira iha nia kna’ar fatin, Arte Moris, Komoro, Dili, Segunda ne’e.
Governante hatutan iha-ne’e atu foti dokumentu hodi hatudu katak legál ba pensaun veteranu ne’e.
Oan-Soru dehan, ba sira-ne’ebé mak simu ona fixa pagamentu mak konta bankária BNF bele hakat simu direitu.
“Pagamentu ne’ebé ita halo hahú loron ohin 15.697 ne’ebé mak ita sei paga. Prosesu hahú daudaun ona iha oras ida kotuk. Ein-prinsípiu pagamentu foufoun la’o sempre hanesan ne’e. Maibé, oras tan ami sei hasai mekanizmu hodi regulariza fali,” nia esplika.
Ministru esplika ema ne’ebé daudaun ne’e la’ós veteranu ne’ebé atu simu resibu maibé iha balun lori inan-aman, tiu, tia no avo sira entaun halo ema barak tiha.
“Orsida ami sei halo mudansa ba mekanizmu no depoiz ami konfirma lai baze dadus. Ami labele pronúnsia agora tanba daudaun ne’e atendimentu la’o hela. Ita sei hato’o ba públiku katak pagamentu la’ós loron ohin de’it maibé ami sei halo pagamentu to’o hotu ba benefisiáriu hamutuk 15.697 ne’e. Ami esforsu atu finaliza iha Dezembru no Janeiru. Kada loron atende ema 700,” Gil esplika.
Oan-Soru hatutan pagamentu ida-ne’e tuir totál benefisiáriu iha kada munisípiu, ezemplu Dili ema barak entaun loron neen (6), Lautein loron lima (5) no munisípiu seluk loron ida-rua de’it. Nune’e, hahú ohin sei ramata iha 26 Janeiru 2026.
Benefisiáriu simu 1º pagamentu iha 2025/12, hamutuk 15.697, kompostu hosi Munisípiu Aileu hamutuk 612, Ainaru 1.000, Baukau 851, Bobonaru 1.145, Kovalima 1.121, Dili 3.906, Ermera 935, Lautein 2.940, Likisá 1.281, Manatutu 682, Manufahi 486, Oekusi 50, Munisípiu Vikeke 634 inklui mós na’in-54 maski ohin sira la marka prezensa.
Entretantu, kombatente ho grau 8a14, Lourenço da Costa, hateten ema hosi munisípiu 13 mai hotu fatin ne’e entaun atende labele duni.
“Ita simu de’it fixa pagamentu sena malu maka’as tebes, ne’ebé ha’u sai mai li’ur hola anin lai mak bele kontinua fali. Atendimentu ne’e ha’u ladún satisfeitu tanba ne’e husu atu aviza ba munisípiu para idak-idak bele iha nia fatin,” nia dehan.
Nia rekomenda presiza iha mekanizmu ba pagamentu atu labele butuk iha fatin ida.
Nune’e mós, kombatente ho grau 8a14, Júlia de Carvalho informa loron ohin ne’e sente kontente tanba bele simu pensaun ida-ne’e.
“Maski sena malu maibé ha’u nafatin kontente tanba Governu bele realiza polítika pagamentu pensaun veteranu ne’e. Ema barak no sena malu ne’e normál. Uluk ita funu karik di’ak hela tanba saida mak ukun aan tiha atu simu direitu ne’e sena malu ladi’ak fali,” nia haktuir.
Jornalista: Osória Marques
Editór: Xisto Freitas da Piedade
