DILI, 30 Dezembru 2025 (TATOLI)—Ministériu Turizmu no Ambiente ne’ebé tutela ba Ministériu Koordenadór Asuntu Ekonómiku (MKAE) husu ba vizitante sira-ne’ebé halo vizita ba fatin turístiku Kristu Rei-Dolok oan hafoin Governu loke provizóriu dalan ne’e atu mantein ambiente ne’ebé saudável.
Koordenadór Jerál Asuntu Ekonómiku, Jorge Rui de Carvalho, hateten problema ida mak bainhira ema hotu hakarak Dili ne’e sai destinasaun turístiku, entaun se la’ós timoroan mak mantein no koko kria imajen di’ak no tenke tenke kuidadu ambiente.
“Tanba ne’e ha’u husu ba ema hotu-hotu tenke asegura fasilidade públiku sira ho di’ak enkuantu Governu kria ona fasilidades balun iha ne’ebá. Signifika ida-ne’e la’ós Governu nian maibé ita hotu iha responsabilidade ba sasán saida mak ita lori ba tenke lori fila-fali ka labele so’e foer arbiru,” Koordenadór ne’e informa ba jornalista sira iha nia knaar fatin, ohin.
Nia dehan, tnba Governu seidauk iha abilidade atu asegura hotu kedas, maibé iha ema balun mak halo jestaun saneamentu no konxiénsia ida-idak nian, tanba Governu agora halo poupansa ba saláriu vensimentu atu labele gasta públiku ho kustu boot liu.
“Entidade no komunidade hotu-hotu iha responsabilidade atu mantein ambiente saudável, pás ijéniku no kuidadu fasilidade públiku,” nia apela.
Enkuantu antes ne’e Governu liuhusi Ministériu Obra Públika, loke provizóriu dala foun Dolok-oan ba to’o Hera ho objetivu atu fó biban ba komunidade festeza iha loron natal no tinan foun, no dalan ne’e loke provizóriu hahú husi loron 20 fulan-Dezembru 2025 to’o 02 fulan-Janeiru 2026.
Jornalista : Alexandra da Costa
Editór : Cancio Ximenes
