Governu taka konta jerál OJE 2025 ho ezekusaun 70% ne’ebé inklui seguransa sosiál
DILI, 01 Janeiru 2026 (TATOLI)-Governu liuhusi Ministériu Finansa taka ona konta jerál Orsamentu Jerál Estadu (OJE) 2025 nian ho totál ezekusaun 70%, ne’ebé inklui seguransa sosiál no 85% bainhira esklui seguransa sosiál.
Serimónia taka konta jerál OJE 2025 ne’e hala’o iha edifísiu Ministériu Finansa, Aitarak-Laran, Dili, ne’ebé dirije husi Primeiru-Ministru, Xanana Gusmão, no akompaña husi membru Governu sira.
Iha okaziaun ne’e, Xefe Governu salienta katak Orsamentu Jerál Estadu nu’udar prosesu importante atu responde ba nesesidade povu nian no tenke jere ho responsabilidade.
“Orsamentu Jerál Estadu nu’udar prosesu ida atu responde ba povu nia moris. Kona-ba oinsá gasta osan Estadu nian dalabarak ita temi beibeik osan povu nian jere ho di’ak. Nune’e mak ohin kalan 31 Dezembru 2025 ha’u sei fó sai ba povu tomak ezekusaun OJE husi 01 Janeiru to’o 31 Dezembru 2025”, Xanana Gusmão hateten.
Turi Xefe Ezekutivu, ezekusaun OJE 2025 hafahe ba kategória lima – saláriu no vensimentu ho totál verba millaun $508.024, nia ezekusaun atuál millaun $477,949 ka 94%. “Sei iha obrigasaun millaun $58 no kompromisu millaun $118 ,maibé iha saldo millaun $29.899 sei fila ba Estadu”, adianta.
Iha bens no servisu koerente millaun $390.670 no ezekuta ona millaun $306.123 ka 78%. Husi orsamentu ne’e, iha obrigasaun hamutuk millaun $8.657 no kompromisu millaun $4.469, no saldo millaun $71.421 ne’ebé filafali ba konfre Estadu.
Iha tranferénsia públika hamutuk $1.245.979 no nia ezekusaun millaun $693.373 ka 56%. Iha obrigasaun millaun $54, kompromisu millaun $491, no saldo ne’ebé filafali ba konfre Estadu hamutuk millaun $552.060.
“Tinan seluk ami sei tau matan didi’ak ba transferénsia públika hodi labele tau osan barak, tanba iha ezekusaun ladún di’ak, tanba saldo millaun $552.060 filafali ba konfre Estadu [husi totál millaun $762.7]”, dehan.
Kapitál menór iha montante millaun $31.741 no ninia ezekusaun hamutuk millaun $23.804 ka 75%. Husi orsamentu ne’e, iha obrigasaun millaun $1.271, kompromisu millaun $5.553, no saldo ne’ebé filafali ba kofre Estadu millaun $1.134.
Kapitál dezenvolvimentu prevee millaun $440.576 ho ninia ezekusaun to’o 31 Dezembru hamutuk millaun $325.518 ka 74, ne’ebé iha obrigasaun millaun $22.571, kompromisu millaun $22.626 no saldo hamutuk millaun $70.051.
Xanana Gusmão salienta katak totál ezekusaun orsamentu 2025, ne’ebé esklui seguransa sosiál hamutuk $2.135.162 atinje $1.823.881 ka 85%. Husi verba ne’e iha obrigasaun millaun $32.602, kompromisu millaun $33.237, no saldo ne’ebé iha millaun $245.442.
Ezekusaun ne’ebé inklui seguransa sosiál hamutuk $2.617.170, ne’ebé to’o 31 Dezembru 2025 atinje $1.826.767 ka 70% no iha obrigasaun millaun $32.602, kompromisu millaun $33.238 no totál saldo millaun $724.565.
“Ne’e duni atu fó hatene ba públiku katak ida-ne’e mak rezultadu ezekusaun OJE tinan nian. Ami taka ona konta jerál OJE 2025”, konklui.
Jornalista: Arminda Fonseca
Editora: Maria Auxiliadora
