DILI, 07 Janeiru 2025 (TATOLI) – Papa Leão XIV taka Odamatan Santa Bazílika Saun Pedro nian iha Solenidade Epifania do Senhor (06 Janeiru), hodi marka fin ofisiál tinan Jubileu ho tema “Peregrino da Esperança” nian.
Enserramentu ka taka finál ba Odamatan Santa hala’o iha inísiu Santa Misa ne’ebé prezide husi Amu-Papa iha Bazílika Saun Pedro no partisipa husi sarani 5.800-resin.
Haktuir Vatican News, durante selebrasaun, Papa Leão XIV prezide Eukaristia no konklui fulan sira Jubileu nian, ne’ebé durante ne’e sarani sira hahú husi mane no feto sira ne’ebé lahotu halo peregrinasaun ho esperansa liuhusi kruzamentu limiár Bazílika Saun Pedro nian.
Amu-Papa deskreve viajen ne’e hanesan peregrinasaun ida ba “Jeruzalén foun, sidade ne’ebé nia odamatan sira nakloke nafatin”.
Reflete kona-ba Evanjellu Mateus nian, Papa destaka kontraste entre ksolok Magu sira-nian no forsa Liurai Herodes nian. Nia nota katak eskritura nunka subar tensaun ne’ebé akompaña Maromak nia aparénsia, ne’ebé evoka reasaun kontrária sira hanesan ksolok no ansiedade, obediénsia no rezisténsia.
Nia hateten loron epifania revela prezensa Maromak nian ne’ebé nunka husik buat sira atu sai hanesan de’it.
“Na’i nia prezensa marka inísiu esperansa nian. Epifania hakotu melankolia no loke buat foun ba agora no futuru, hanesan promesa profeta hateten: “Hamriik bá, nabilan, basá ó-nia roman to’o ona, no Na’i nia glória mosu ona iha ó-nia leten”, Papa Leão hateten.
Amu-Papa mós fó hanoin ba sarani katak Jeruzalén sidade ida ne’ebé familiár ho revelasaun sai nakdoko, tanba ema májiku sira-nia buka. Nia hateten katak sira ne’ebé hanoin katak sira iha ona resposta hotu dalabarak lakon abilidade atu husu pergunta sira no haburas sira-nia saudades, situasaun ne’e, kontinua, hamosu mós dezafiu ida ba uma kreda.
Hanoin kona-ba signifikadu Jubileu nian, Amu-Papa Leão XIV konvida sarani sira atu reflete kona-ba buka espirituál mane no feto nian ohin loron. Nia subliña katak májiku sira sei iha ohin loron, sira ne’ebé obriga atu sai no buka, maski hasoru risku nakonu iha mundu ida ne’ebé dalabarak la amigavel.
Tuir Evanjellu, Amu-Papa, bolu kreda atu la ta’uk risku sira ne’ebé iha, maibé hasoru ho fiar grasa Maromak nian.
Amu-Papa subliña katak fatin sira Jubileu nian tenke roman moris no esperansa nian, no sai sinál ida katak “mundu seluk hahú ona”. Nia mós kestiona Kreda nia prontidaun atu fó fatin ba buat foun ruma, no iha vontade atu haklaken Na’i ne’ebé lori ema iha viajen fiar nian.
Hakotu ninia omília, Papa subliña katak esénsia Epifania nian mak prezente ida ne’ebé labele sosa ka kontrola. Labarik (Jezús) ne’ebé májiku sira adora maka buat di’ak ida ne’ebé folin liu. Nia mosu mai la’ós iha fatin ne’ebé furak, maibé iha simplisidade mak Belein nian.
“Furak tebes sai peregrinu esperansa nian no la’o hamutuk. Kreda bolu la’ós atu sai monumentu ida, maibé uma ida, nune’e bele kontinua sai jerasaun ida loromatan foun nian, ne’ebé orienta husi Maria, fitun dadeer nian, ba umanidade ida ne’ebé transforma husi domin Maromak nian ne’ebé halo ema”, konklui.
Notísia relevante: Don Norberto enserra Tinan Jubileu Esperansa 2025 ho mensajen Komuñaun, Partisipasaun no Misaun
Fonte: Vatican News
