Ekipa Forsa Tarefa Konjunta finaliza ohin serbisu fó seguransa iha territóriu
DILI, 06 Janeiru 2026 (TATOLI)—Ekipa Forsa Tarefa Konjunta ne’ebé kompostu husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ramata ona nia serbisu hodi fó seguransa iha territóriu, hahú iha loron 28 Novembru to’o tinan foun.
Komandante Jerál PNTL Komisáriu Jerál Polísia Henrique da Costa, hateten, Komandu PNTL no F-FDTL iha Segunda (05/01) atualiza ona kestaun ne’e ba malu.
“Orsehik ita halo ona diskusaun ho señor Komandante Falur, Xefe Estadu Maiór Jenerál kona-ba ezisténsia Forsa Tarefa Konjunta, ita halo komunikasaun, ita hatene katak ohin ne’e ramata. Agora ita prepara relatóriu para aprezenta mai Komandante Jerál no Xefe Estadu Maiór Jenerál hodi kontinua ba Ministériu Interiór no Ministériu Defeza,” Komisáriu Jerál Henrique da Costa, hato’o ba jornalista sira iha ninia knaar fatin, Kuartel Jerál PNTL, Kaikoli, Tersa ne’e.
Notísia relevante : MI louva Forsa Tarefa Konjunta nia serbisu
Nia dehan, Komandu Jerál PNTL ohin bolu ona Komandu operasaun sira husi PNTL Forsa Defeza atu fó orientasaun hodi nune’e prepara relatóriu ruma depois mai halo aprezentasaun mai Komandu hodi kontinua pasa ba ministériu relevante.
Aleinde ne’e, iha semana oin sei realiza formatura jerál hodi enserra Forsa Tarefa bele koordena ninia serbisu.
“Ohin ne’e iha hela faze orientasaun para semana oin ita sei rona ka konvida ita-boot sira mai partisipa serimónia parada konjunta hodi ramata,” nia akresenta.
Iha sorin seluk, Komandante Jerál apresia ba Forsa Tarefa Konjunta nia serbisu fó seguransa iha territóriu tomak.
“Ita agradese no apresia ba esforsu tomak ne’ebé mak sira halo. Ita mós agradese ba Governu tanba iha inisiativa bele koloka forsa rua hamutuk hodi halo servisu koordena ba medida prevensaun sira. Ita akompaña hahú husi forma Forsa Tarefa sira koordenada. Koordena iha loron 28 Novembru iha kapitál, munisípiu to’o suku no aldeia sira inklui área rurál,” nia katak.
Polísia dalaruma hamutuk ho forsa sira halo kontrolu iha munisípiu to’o fronteira.
“Sira-nia serbisu kapas tebes, ne’ebé lori rezultadu di’ak ba ema hotu hakmatek. Maski mosu duni problema tuda malu maibé joven sira kontente bele festeza tinan foun,” nia tenik.
Iha ámbitu Natál no Tinan Foun joven sira balun hetan influénsia ho alkól nune’e provoka malu no tuda malu maibé ne’e la fó impaktu boot ba parte seguransa tanba bele responde.
Jornalista : Natalino Costa
Editora : Julia Chatarina
