DILI, 09 Janeiru 2026 (TATOLI)–Kompetisaun faze apuramentu entre klube segunda divizaun Liga Futeból Timor-Leste (LFTL) sei kontinua hikas iha semana oin, 14 Janeiru 2026.
Prezidente Liga Futeból Timor-Leste, Ipolito Soares esplika kompetisaun referida paradu iha fulan-Dezembru relasiona ho difikuldade sira hanesan kampu, limitasaun arbritrazen no sei halo evaluasaun nune’e liuhusi reuniaun entre dirijente klube ho órgaun sira deside sei kontinua hikas iha meiadu janeiru tinan-ne’e.
“Kondisaun infraestrutura kampu mak limitadu, tanba ne’e jogu tarde. Nune’e, ami husu klube tenke pasiénsia atu komisaun organiza kompetisaun ne’e to’o remata,” Prezidente LFTL hateten iha ninia kna’ar fatin, Kaikoli, Dili, Sesta ne’e.
Liuhusi enkontru, parte órgaun liga no dirijente klube sira halo evaluasaun ba jogu apuramentu ne’ebé hala’o liubá ho objetivu rona sujestaun, krítika no rekomendasaun inklui enkontru téknika nune’e hadi’a fallansu hotu hodi kontinua kompetisaun ho di’ak.
Iha reuniaun referida, órgaun LFTL deside iha faze kualifikasaun sei utiliza kampu futeból rua hanesan iha Don Bosco Komoro no Kampu Fatumeta no sei fahe oráriu fixu ba klube sira nune’e bele finaliza faze apuramentu antes hakat bá faze eliminasaun.
“Ami responsabiliza ba fallansu hotu no husu kontinua iha konfiansa ba malu nune’e loron 14 Janeiru hahú fali kompetisaun to’o ramata,” Ipolito tenik.
Faze apuramentu segunda divizaun fahe ba grupu ualu ho totál partisipante klube 39 hanesan grupu A kompostu : Relay FC, São José, Belta 3, Ataúro FC no Naimeko. Grupu B : ADR União, B2B, Fima Sporting, Covalima no Fatunsa FC. Grupu C : ADR União Mamura, Kantada, Assa FC, Natura no Unidos.
Grupu D : FC Lero, Warik Oan, As Rai-metin, Tatamailau no Leopa FC. Grupu E : YMCA, Santo António FC, Rai-klaran, Maudoko no Dark Blue FC.
Grupu F : Karau-Fuik FC, Ostiko, Ad Bas, Akademia Hera FC no Saralima FC. Grupu G : Laisorulai, Sousa United, Ablai FC, Aimo FC no Weasel FC. Grupu H : Mota-ain, IRA-PUA, Hibers FC no Mota-Bandeira FC.
Jornalista: Natalino Belo
Editór: Xisto Freitas da Piedade
