DILI, 14 Juñu 2026 (TATOLI)—Ekipa DIT FC susesu iha jornada daruak Primeira Divizaun Liga Futeból Timor-Leste (LFTL) époka 2026 ho vitória dramátika 2-1 hasoru Aitana FC iha jogu ne’ebé hala’o Domingu loraik ne’e, iha Estádiu Munisipál Dili.
Jogu ne’e lidera husi árbitru prinsipál Francisco Pereira. Bainhira hú apitu dahuluk, jogadór sira lansa kedan kontra-atake ba malu tuir tékniku no abilidade ekipa idaidak nian.
Maski luta naruk ekipa rua halo, liuhusi xuta bola husi ain bá ain, hale’u kampu matak nia laran, maibé iha primeira parte la fó golu ba parte rua.
DIT ho formasaun 4-4-2 tenta domina jogu liuhusi meiu kampu Rubasko Lopes no Nelson Boavida, maibé Aitana FC nia defeza ne’ebé komanda husi Mario Neves no Denilson Ronsumibre konsege blokeia metin. Jogadór rua kria okaziaun balun, maibé guarda-rede Dingque Mosso husi DIT no Samuel Noi husi Aitana FC salva hotu. To’o árbitru Francisco Pereira hú apitu ba deskansu, rezultadu kontinua 0-0.
Hahú segunda parte, Aitana tama ho agresividade aas liu. Treinadór Joseph Komson nia estratéjia funsiona iha minutu 53. Richard Nana Yaw, jogadór ho kamizola númeru 23, simu bola iha liña atake, fura defeza DIT no xuta kruzada ne’ebé liu Dingque Nosso nia liman. Golu ne’e halo Aitana FC lidera temporáriu 1-0 no fó esperansa ba sira-nia adeptu fanátiku sira.
Maibé DIT la rende. Treinadór Armand Mialibata halo troka estratéjiku iha minutu 45 no 58 hodi introdús jogadór foun. Presaun ne’e fó rezultadu iha minutu 70. José Santos, avansadu ho númeru 7, aproveita bola soltu iha área penalidade no xuta forte hodi impata jogu 1-1.
Jogu sai dramátiku liután, DIT hakotu jogu iha minutu 80. Defeza Aitana falla iha bola área oin, jogadór Tanimola Ayobami, defeza sentrál ho númeru 6, sa’e aas liu hotu hodi hatama golu ho ulun no golu ne’e fó vitória ba DIT. Rezultadu nakfilak sai 2-1 no rezultadu ida-ne’e metin to’o apitu finál lian, maski Aitana FC tenta buka golu atu impata.
Jogu ne’e mós akompaña ho intensidade aas ne’ebé árbitru tenke fó kartaun ba jogadór hirak ne’ebé kria erru iha kampu laran durante jogu. DIT simu kartaun kinur rua (2) liuhusi Leonardo Barros iha minutu 72 no Fernando Freitas iha minutu 89.
Iha parte Aitana, Richard nana Yaw hetan kartaun kinur iha minutu 16, Dulfricson da Costa iha minutu 41, no Bernardo Silva hetan kartaun mean direta iha minutu 66 tanba halo protesta maka’as hasoru árbitru maski nia hanesan jogadór suplente.
Ho rezultadu 2-1 ne’e, DIT foin mak akomula pontu tolu (3) husi joga daruak no iha jogu primeiru lakon ho Santa Cruz FC. Enkuantu, Aitana sei nafatin iha pozisaun okos tanba foin rekolla pontu ida (1), jogu dahuluk impata ho Porto Taibessi. Iha tabela klasifikasaun provizória, SLB mak iha leten liu ne’ebé akomula ona pontu neen (6) husi joga daruak.
Skuad DIT
(24) Dingque Mosso, (4) Jojo Moreira, (6) Tanimola Ayobami, (20) Natalino Salsinha, (12) Leonardo Barros, (11) Ainaould Menmende, (16) Rubasko Lopes, (3) Rudolf Asantes, (8) Nelson Boavida, (7) José Santos, (9) Genivaldo da Silva.
Jogadór suplente
(25) Egídio Calapez, (1) Aquino Marqez, (2) Grafinho da Cunha Ku, (5) Mourinho de Jesus, (18) Martinho Vaz, (23) Pedro Fernandez, (21) Lamberto Ximenes, (15) Fernando Freitas, (14) Tito Pereira, (19) Marcos Nunhaq.
Skuad Aitana
(99) Samuel Noii, (22) Ribeiro Lay, (12) Edson da Silva, (16) Mário Neves, (77) Denilson Ronsumibre, (23) Richard Nana Yaw, (22) Rui Soares, (11) Josen da Cunha Ku, Eviano da Costa, (27) Altun Yasin, (7) Antoninho Marques.
Jogadór suplente
(32) Jayro Moniz, (10) Queresma da Silva, (6) Zhindelos Lopes, (20) Bernardo Silva, (21) João Sozulu, (28) Alexandre Miranda, (29) Dulfrescso da Costa, (2) Francisco da Costa.
Jornalista: Hortêncio Sanchez
Editór: Xisto Freitas da Piedade
