DILI, 18 marsu 2022 (TATOLI)—Xefe Suku Kuluhun, Deus Dado Martins apela ba komunidade atu partisipa másimu iha eleisaun prezidensiál 2022 hodi hili Prezidente Repúblika ne’ebé sai prezidente ba povu tomak no sai povu nia prezidente atu hadi’a Timor-Leste.
“Hanesan xefe suku iha Kuluhun, ha’u espera katak ha’u-nia komunidade sei mai fó sira-nia direitu ba iha festa demokrásia ida-ne’e, tanba hanesan aman ba suku ne’e ha’u husu komunidade iha suku kuluhun ne’ebé iha aldeia hitu (7), hakarak ka lakohi, tenke mai sedu hodi fó ita-boot sira-nia direitu atu hili ita-nia Nai Ulun ida-ne’ebé ita hotu nia hakarak no interese atu hadia Nasaun ida-ne’e sai Nasaun ida-ne’ebé ita hotu hakarak iha Timor ida-ne’e,” Deus Dado Martins, informa ba Agénsia Tatoli, iha nia knaar-fatin, Kuluhun, Díli, sesta ne’e.
Ba komunidade ne’ebé moras todan ka ema ho defisiénsia ne’ebé la’o dook, líder komunitáriu ne’e sei servisu hamutuk ho ekipa brigada atu buka mekanizmu oinsá atu ema moras ne’e bele tuir vota.
“Durante ne’e informasaun ami habelar ona ba aldeia hitu (7), liuhosi ami-nia membru konsellu suku sira hodi fó informasaun katak aban sira mai vota iha sentru votasaun ne’ebé Governu prepara ona,” nia dehan.
Esperansa ba Prezidente Repúblika foun
Entretantu, ninia esperansa ba kandidatu Prezidente Repúblika períodu 2022-2927 hamutuk na’in-16 ne’ebé entre sira-ne’e ema ida mak elitu karik, tenke sai Prezidente Repúblika ba nasaun no povu Timor-Leste labele sai fali Prezidente ba sira-nia partidu.
“Ida ne’e mak ema hotu nia esperansa atu ema hotu fó fiar, nune’e tinan liman oin mai ita mós tau fiar nafatin. Se Prezidente Repúblika ita hotu ba hili mak nia sai fali Prezidente ba partidu ne’e ema sei la fiar nia, Ne’ebé tinan lima oin mai mós ema sei la fó nia votu ba nia,” nia dehan
Sentru votasaun iha suku Kuluhun iha tolu mak hanesan sentru votasaun ida iha sede Suku Kuluhun no rua seluk iha Eskola Primária Númeru-04 Kuluhun. Enkuantu, totál komunidade iha suku Kuluhun hamutuk 9.910, ne’ebé mai hosi aldeia hitu (7) hanesan aldeia Toko Baru, Nato, Soru Mutu ba Dame, Lao Rai, Tane Mutu, Funu Hotu no Loe Laco.
Jornalista : Nelia Fernandes
Editór : Cancio Ximenes
