DILI, 18 agostu 2023 (TATOLI)—Prezidente Repúblika (PR), José Ramos Horta, kinta ne’e, kondekora eskritór timoroan, Luís Cardoso de Noronha “Takas”, ho Kolar Orden Timor-Leste.
Notísia Relevante: Prezidente Repúblika hato’o parabéns ba eskritór timor-oan Luís Cardoso
Iha dekretu Prezidente Repúblika nú.74/2023 hodi atribui kondekorasaun ne’e, PR konsidera Luís Cardoso, dezempeña atividade sira ho importánsia aas ba kauza autodeterminasaun no independénsia Timor-Leste, liuhusi kna’ar sira-ne’ebé nia hala’o nu’udar reprezentante Konsellu Nasionál Rezisténsia Maubere (CNRM) iha Portugál, hodi serbisu hamutuk ho reprezentante espesiál CNRM no Laureadu Nobel ba Pás, José Ramos Horta.
Alende ne’e, hakerek-na’in mós hola parte iha delegasaun Rezisténsia Timoroan ne’ebé hasoru malu ho antigu Prezidente Áfrika do Sul, Nelson Mandela, iha Lisboa, Portugál.
“Takas halo ami orgullu no hariku literatura timoroan. Ami hotu orgullu bainhira lee livru sira hosi hakerek-na’in Takas ne’ebe tradús ba lian oioin, iha nasaun barak no sujeitu ba krítika literaria iha jornál sira internasionál,” PR Horta hateten liuhosi diskursu ihaa Palásiu Prezidensiál NIcolau LObato, Bairru Pite.
PR rekoñese Luís Cardoso “Takas” la’os de’it hanesan mestre-boot literatura Timor-nian maibé mós ba lian seluk hosi nasaun barak.
Xefe Estadu fó hanoin, dalan ida-ne’ebé Prezidénsia Repúblika no instituisaun Estadu no privada sira bele halo hodi insentiva ábitu lee iha Timor-Leste, mak fó koñese autór sira hosi área ida-ne’e ba joven no ba poténsia sani-na’in sira.
Luís Cardoso hateten, prémiu literáriu, buat ne’ebé akontese ba hakerek-na’in ida-nia moris, bainhira fiar iha valór no kualidade hosi nia traballu, kondekorasaun, buat ne’ebé Estadu fó ba nia sidadaun ida ba serbisu sira relevante.
“Ha’u la halo traballu relevante ida ba ha’u-nia rain, durante tinan-20 liubá, maibé presta de’it ha’u-nia kontribuisaun ba ezisténsia literatura timoroan nian,” nia hateten.
Nia fiar katak, sedu ka tarde Timor-Leste sei iha hakerek-na’in estraordionáriu iha Timor-Leste.
Tuir Dekretu-Lei númeru 20/2009, Orden Timor Leste nu’udar rekoñesimentu hosi Estadu ba sidadaun nasionál ka ema estranjeiru, ne’ebé mak liuhosi sira-nia atividade profisionál, sosiál ka asaun espontánea nakonu ho korajen, fó kontribuisaun boot ba Timor-Leste, ba timoroan ka ba umanidade.
Luís Cardoso hakerek-na’in timoroan rekoñesidu internasionalmente no manan-na’in “Prémiu Oseanu”, ida hosi prémiu literáriu respeitadu liu iha mundu luzófonu, hakerek ona livru hitu, inklui novella, kontu, no ensaiu ne’ebé tradús ba lian oioin. Iha nia obra sira, dala barak esplora tema sira hanesan funu, eziliu no luta ba independénsia.
Luís Cardoso, oan husi enfermeiru ida-ne’ebé hala’o kna’ar iha fatin barak iha Timor-Leste, moris iha Cailaco, Bobonaro, iha 1958.
Nia estuda iha Koléjiu misionáriu Soibada no Fuiloro no tuir mai, iha Semináriu Dare no Liseu Dr. Francisco Machado, Díli.
Nia hela iha Timor-Leste to’o de’it tinan-18, hafoin muda ba hela iha Portugál no ramata kursu lisensiatura iha silvikultura iha Institutu Superiór Agronomia Lisboa.
Jornalista : Nelson de Sousa
Editór : Cancio Ximenes
