BOBONARO, 07 novembru 2023 (TATOLI) – Abitante lokál ne’ebé sai vítima iha konfrontu entre suku Lourba no Carabau, postu administrativu Bobonaro, munisípiu Bobonaro to’o agora balu sei kontinua hela ho família sira, tanba uma hetan estragus totál.
Tuir dadus ne’ebé TATOLI rekolla iha terrenu nota katak, uma-kain ne’ebé sunu mutuk hamutuk sia no unidade 10-resin estragu.
Notísia relevante: Estudante EBC Gumer no EBF Nazare iha Lourba seidauk tama aula
“Ha’u-nia povu balu sei hela iha ninia família sira, tán de’it ninia uma ahi haan totál, dalaruma balu uma ne’e aat nia sei hela nafatin ho família sira,” Xefe suku Lourba, Lino de Jesus,informa ba jornalista sira, iha Eskola Ensinu Baziku Sentrál (EBC) Gumer, tersa ne’e.
Nia fó-sai katak, iha loron 04 novembru semana kotuk, Primeiru Ministru, Kay Rala Xanana Gusmão no Autoridade Protesaun Sivíl fó ona apoia emerjénsia hanesan; aihaan, sasán bázika sira, hansan sanan, taxu, bikan, kadeira no xumasu.
“Horisehik sira fó informasaun, katak segunda tenke simu materiál ne’ebé atu halo fali sira-nia mahon ne’ebé mak agora daudaun ahi haan hotu,” nia fó-sai.
Enkuantu iha loron-segunda, hahú tuku 09:00 joven suku Lourba no suku Carabau halo ona limpeza jerál ba uma sira-ne’ebé sunu no hetan estragu.
Tuir observasaun Agência Tatoli iha terrenu nota katak, maske joven suku rua ne’e hadame malu ona maibé Polisía Nasionál Timor-Leste (PNTL) Komandu Munisípiu Bobonaro, Unidade Espesiál Polísia (UEP) no FALINTIL-Forsa Defeza Timor-Leste (F-FDTL) kontinua halo Patrullamentu rútina hodi garante situasaun hakmatek ba komunidade hotu.
Notísia relevante: Vítima hosi kazu Lourba iha tratamentu ospitalár
Jornalista : Sérgio da Cruz
Editór : Evaristo Soares Martins
