DILI, 01 agostu 2024 (TATOLI)-Juíza Administradora Tribunál Judisiál Primeira Instánsia Dili, Edite Palmira dos Reis, hateten, Tribunál Judisiál Primeira Instánsia Dili (TJPI), hahú toma férias judisiáriu.
“Juíz sira iha Tribunál Judisiál Primeira Intánsia Dili hahú ohin dia 1 de augosto ba to’o 15 setembru,” Juíza Administradora, Edite Palmira, hateten ba jornalista sira iha nia kna’ar fatin Tribunál Tribunál Judisiál Primeira Instánsia Dili, kinta ohin.
Nia dehan, durante iha férias judisiáriu, Tribunál julgamentu ba kazu urjente de’it hanesan Primeira Interrogátoriu, prosesu sumáriu, jugamentu emerjénsia ba arguidu sira ne’ebé iha prizaun inklui ba kazu sívil liliu ba kazu providensia kautelár sira.
“Durante férias judisiáriu Juíz sira ne’e sei servisu tuir nia turnu ne’ebé fahe ona, inklui mós ba iha Ofisiál Justisa sira mós hanesan sei koloka tuir nia turnu, atu nune’e garante nafatin ba funsionamentu Tribuná lnian tanba normalmente tenke la’o nune’e. Se lae ema hanoin iha ona férias judisiáriu, ne’ebé funsionamentu ba Tribunál lala’o; lae ne’e la’ós hanesan ne’e,” nia esplika.
Edite Palmira informa, férias judisiál ne’e bazea ba lei númeru 15/24 juñu 2015 ne’ebé regula katak, majistradu judisiáriu sira iha direitu ba férias hahú husi loron 1 augustu to’o 15 setembru.
“Tanba ne’e, Konsellu Superiór Majistratura Judisiáriu aprova ona katak Juiz sira iha direitu ba férias iha 25 dias,” nia konklui.
Notísia relevante:Férias judisiál, Tribunál Rekursu sei funsiona parsialmente
Jornalista: Natalino Costa
Editór: Rafael Ximenes de A. Belo
