DILI, 07 setembru 2024 (TATOLI)–Ekipa konjunta Sekretária Estadu Asuntu Toponímia no Organizasaun Urbana (SEATOU) no Polísia Tranzitu entrega fali xave karreta no motorizada hamutuk 24 ba negosiante sira iha Portu Dili ne’ebé ekipa SEATOU halo apreensaun iha Tasi-Tolu iha fulan rua liuba, tanba kontra orden públiku.
“Ekipa SEATOU no PNTL entrega karreta hamutuk hitu (7) no motorizada hamutuk 17. Governu halo apreensaun ba veíkulu no motorizada sira, tanba kontra ordem públika. Agora entrega fali xave ba sira hodi bele halo fali negósiu. Sidadaun hotu-hotu tenke hakruuk ba lei, tanba ne’e tenke kopera ba Estadu,” Sekretáriu Estadu Asuntu Toponímia no Organizasaun Urbana (SEATOU), Germano Santa Brites, hateten ba jornalista sira, iha Portu Dili, sábadu ne’e.
Governante ne’e hateten, ekipa konjunta SEATOU entrega fali karreta no motorixada hirak ne’e ba na’in, tanba negosiante sira-ne’e selu ona koima ba iha Estadu.
Iha fatin hanesan, Inspetur Tranzitu husi PNTL, Afonso da Silva, hateten PNTL halo apreensaun ba iha motorizada no veíkulu sira iha ne’e tanba viola regra.
“Fou-foun fó avizu ba sira, maibé sira kontinua ba faan karreta no motor iha Tasi-Tolu, entaun ekipa konjunta husi SEATOU no PNTL halo apreensaun, tanba la obedese ona ba Estadu. Ami la’ós tanba odiu ba imi-nia megosiu, maibé lei mak haruka no rai ida-ne’e presiza hadi’a,” nia dehan.
Inspetur ne’e husu ba negosiante sira atu labele viola regra no lei ordenamentu públika hodi ba faan iha fatin públika sira iha kapitál, bainhira laiha autorizasaun husi ministériu ka instituisaun relevante sira.
Negosiante Hilario dos Santos hateten, ekipa konjutan husi SEATOU no PNTL halo apreenssaun iha fulan rua liuba, tanba faan iha espasu públiku iha Tasi-Tolu no agora foti fali sira nia veíkulu no motorizada tanba selu ona koima ba Estadu.
“Ami selu koima kada motor $100 no kada veíkulu $250 ba Estadu,” nia hateten.
Jornalista : Jauína Xavier
Editór : Cancio Ximenes
