DILI, 20 Agostu 2025 (TATOLI)—Governu liuhusi Ministériu Defeza (MD) hamutuk ho organizasaun intergovernamentál g7+, kuarta ne’e, iha Salaun Nobre Ministériu Negósiu Estranjeiru no Kooperasaun (MNEK) Dili, realiza konferénsia internasionál ho tema “A Reforma do Setor da Defesa e Seguransa: o Encino Superior Militar a Liderança e a Defesa dos Recursos Nasionais”.
Iha konferénsia ne’e atu komemora tinan 50 ezistensia FALINTIL no iha ámbitu ne’e g7+ liuhusi Sekretáriu Jerál, Helder da Costa, toka liu asuntu tranzitóriu komun ne’ebé nasaun membru g7+ enfrenta durante ne’e.
“Iha konferénsia ne’e ha’u aprezenta foka liu-ba tranzitória komun ne’ebé nasaun membru g7+ atravesa iha ámbitu komemorasaun tinan 50 ezistensia FALINTIL. Hakarak louva katak tranzitoria ne’ebé ita Timor-Leste la’o, fó inspirasaun tebes ba nasaun membru hotu g7+ nian,” Helder da Costa hateten ba Agência TATOLI bainhira ramata konferénsia referida.
Nia dehan, g7+ sempre alerta ba mundu katak Timor-Leste iha buat pozitivu barak mak bele oferese ba rai seluk no bele aprende mós husi rai seluk kona-ba esperiénsia oioin.
“Ha’u mós ko’alia liu kona-ba alkansu ne’ebé Timor-Leste liuliu nasaun ne’e moris iha pás, ida-ne’e importante liu ba mundu internasionál. Ema hotu haree Timor-Leste nia tranzitoria ida-ne’e kapaas tebes no moris iha pás ida-ne’ebé inspirasionál, nune’e mak g7+ habelar nafatin pás ba mundu,” nia dehan.
Nia hatutan, tema ne’ebé tau ba iha komemorasaun tinan 50 ezisténsia FALINTIL katak “Halibur Pás ba Mundu” ida-ne’e importante tebes no ida-ne’e mak misaun prinsipál g7+ nian.
“g7+ kontinua nafatin hanesan pista ida, hanesan kamiña ida ba ita Timor-Leste hodi brilla ita nia pás, halibur nasaun hotu atu moris iha pás no labele monu ba iha jogada husi interese nasaun nian no protesaun rekursu naturál nu’udar elementu diplomasia foun ba futuru,” nia dehan.
Tuir nia, papel FALINTIL-Forsa Defeza Timor-Leste (F-FDTL) nian importante tebes atu asegura Timor-Leste nia soberania no kria pás no trankillu iha klima ida hakmatek no laiha violénsia.
Jornalista : Hortencio Sanchez
Editór : Cancio Ximenes
