DILI, 12 Juñu 2026 (TATOLI)—Autoridade Inspesaun Fiskalizasaun Atividade Ekonómiku no Sanitária no Alimentár (AIFAESA), husi Janeiru to’o Juñu, identifika operadór ekonómiku ne’ebé komete infrasaun kompostu husi kapitál Dili to’o munisípiu hamutuk-373.
Enkuantu ho totál inspesaun ba operasór ekonómiku hamutuk 4.427 ne’e kompostu husi Dili hamutuk 3.678, Líkisa hamutuk 616, RAEOA hamutuk 326, Manufahi hamutuk 320, Baukau hamutuk 304, Ermera hamutuk 255, Kovalima hamutuk 186, Vikeke hamutuk ualu (8), Aileu hamutuk rua (2) no Bobonaru hamutuk lima (5).
Inspetora Jerál AIFAESA, Odete Maria Viegas, hateten infrasaun hirak ne’e komete barak liu husi setór komérsiu ne’ebé hamutuk-288, daruak husi setór turístiku hamutuk-88 no datoluk husi setór indústria hamutuk-lima (5).
“Ami mós halo ona inspesaun ba setór tolu ne’e hahú husi kapitál Dili to’o munisípiu hamutuk-4.427 ne’e kompostu husi setór komérsiu hamutuk-3.572, indústria hamutuk-214 no turístiku hamutuk-641,” Inspetora Jerál AIFAESA relata ba Agência Tatoli iha nia kna’ar fatin, ohin.
Dirijente ne’e dehan, husi inspesaun ne’ebé sira halo konsege apreendidu tipu produtu sira hanesan produtu aihan + laós-aihan, bebida-alkolika no laós- alkolika, no tabaku ilísitu hamutuk-17.450 no produtu ne’ebé sei halo hela selajen hamutuk-11.061.
“Husi ne’e, ami aplika koima ba infratór sira no sira tenke selu koima ne’ebé ami fó. Maibé, atu dehan mós katak prosesu selu koima bele liuhusi maneira rua. Ida, mak pagamentu voluntária no ida seluk (2) mak pagamentu koima liuhusi desizaun finál,” nia dehan.
Nune’e, husi infrasaun sira-ne’e hotu AIFAESA konsege rekolla reseita ba kofre Estadu hahú husi fulan-Janeiru to’o Juñu hamutuk $404.885.00. Ne’e kompostu husi pagamentu voluntáriu hamutuk $236.595,00 no pagamentu koima liuhusi desizaun finál hamutuk $168.290,00.
“Iha fulan-Janeiru ami rekolla reseita hamutuk $34.950.00, Fevereiru hamutuk $140.470.00, Marsu hamutuk $61.175,00, Abríl hamutuk $81.695,00, Maiu iha $72.845.00 no juñu hamutuk $12.100,00,” nia informa.
Jornalista : Alexandra da Costa
Editór : Cancio Ximenes
