DILI, 19 Marsu 2026 (TATOLI)—Reitór Instituto Superior de Filozofia e de Teologia, D. Jaime Garcia Goulart, Pe. Justino Tanec, hateten Institutu Superiór Filozofia no Teolojia sei utiliza subvensaun públiku hamutuk rihun $46 ne’ebé apoiu hosi Ministériu Ensinu Superiór, Siénsia no Kultura (MESSK) ba programa haat iha tinan 2026.
Programa dahuluk ba infraestrutura, daruak apoiu ba dosente hodi halo peskiza no hakerek, datoluk apoiu ba estudante hodi kria atividade debate sientífiku, fasilita kursu portugés, inglés no mós atividade desportu entre estudante sira.
“Tinan-ne’e ami rona katak MESSK prepara ona rihun $46-resin mai ISFIT maibé sei iha prosesu proposta. Parese iha fulan-Abríl ne’e Governu sei aloka orsamentu ne’e mai ISFIT,” Reitór ISFIT Tanec dehan ba jornalista sira iha salaun ISFIT, Fatumeta, Kinta ne’e.
Notísia relevante: Lansa ona portál VRM no livru ISFIT
Enkuantu, Padre Tanec dehan, ba programa transversize, katak sosa livru hodi rai iha biblioteka no mós fasilidade formasaun ba dosente sira atu hasa’e liután sira-nia kapasidade iha pedagójika no seluk tan.
Reitór ne’e aprofunda, iha faze dahuluk 2024, MESSK apoiu subvensaun públiku ba ISFIT ho montante rihun $200. Hosi osan ne’e ba infraestrutura hanesan green kampu no programa seluk tan.
Portantu, iha faze daruak ba tinan 2025, ISFIT kontinua hetan subvensaun públika husi MESSK ho monatante rihun $100-resin ba infraestrutura no programa akadémika sira iha ISFIT.
Entretantu, Ministru Ensinu Superiór, Siénsia no Kultura, José Honório hateten MESSK nafatin apoiu osan subvensaun públika ba Institutu Ensinu Superiór sira hotu inklui ISFIT.
“Osan subvensaun públika hosi ministériu, ISFIT halo ba nia atividade no programa sira. Maibé, importante kapasita língua ba dosente no estudante sira hodi hasa’e sira-nia koñesimentu,” Ministru José tenik.
Biban ne’e, Ministru enkoraja ensinu superiór sira atu utiliza osan subvensaun públika ba programa ne’ebé iha vantajen ba dosente no estudante sira.
Jornalista: Osória Marques
Editór: Xisto Freitas da Piedade
