DILI, 16 juñu 2020 (TATOLI) – Ministériu Solidariedade Sosiál no Inkluzaun (MSSI) simu hotu ona dadus uma-kain Rejiaun Autoridade Espesiál Oé-cusse Ambeno (RAEOA) husi Ministériu Administrasaun Estatál (MAE).
“Ami simu ona dadus husi Ministériu Administrasaun Estatál hamutuk uma-kain 23.000 no prosesu sei la’o hela, kuandu finaliza ona maka bele hahú ona pagamentu subsídiu ba uma-kain iha Oé-cusse”, relata Vise Primeiru-Ministru (VPM) no Ministra Solidariedade Sosiál no Inkluzaun, Armanda Berta dos Santos hafoin hasoru Primeiru-Ministru, Taur Matan Ruak iha Palásiu Governu, tersa ne’e.
Antes ne’e Prezidente Rejiaun RAEOA, Arsénio Paixão Bano hasoru malu ona ho Ministra Berta hodi aselera prosesu pagamentu subsídiu uma-kain iha Oé-cusse ne’ebé seidauk realiza.
“Pagamentu ba RAEOA ninian, horiseik ami rua Prezidente Autoridade hasoru malu ona atubele haree prosesu pagamentu iha tempu badak ne’ebé dala ruma iha fin fulan-juñu bele realiza ona pagamentu no prosesu ne’e daudaun la’o hela,” nia dehan.
Governante ne’e informa, ekipa MSSI sei tun direta ba Oé-cusse hodi hamutuk ho ekipa husi MAE hodi halo pagamentu.
Dadaun ne’e, Ministériu Solidaridade no Inkluzaun (MSSI) kuaze konklui ona pagamentu ba uma-kain iha munisípiu 12 hamutuk 298.119 ho totál orsamentu hamutuk $59.623.800 ba pagamentu $200 kada uma-kain, la inklui RAEOA.
Jornalista: Antónia Gusmão
Editora: Julia Chatarina
