DILI, 10 Juñu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, kontinua halo julgamentu ba kazu pekulatu ne’ebé envolve husi Ofisiál Superiór Polísia Nasionál Timor-Leste (PNTL) ho inisiál JB inklui arguidu na’in-rua seluk.
Tribunál liuhusi Juíz Prosesu Ercilia de Jesus, iha audiénsia julgamentu ne’e pronúnsia katak, Arguidu JB foin daudaun hato’o rekerimentu ida mai Tribunál hodi husu atu halo akareasaun tuir artigu 140 husi Kódigu Prosesu Penál Timor-Leste.
Iha artigu ne’e sita katak, kuandu faktu ida iha testemuña ruma nia depoimentu iha opozisaun direta ho testemuña seluk nian, testemuña ida nia depoimentu iha opozisaun direta ho lezadu ka arguidu nia deklarasaun, arguidu nia deklarasaun iha opozisaun direta ho lezadu nian, ka arguidu ida nia deklarasaun iha opozisaun direta ho arguidu seluk, bele halo akareasaun ba ema sira-ne’ebé tama.
Notísia relevante : Ofisiál Superiór PNTL ida suspeitadu halo agresaun fízika hasoru Filomena Soares
- Kuandu ema sira-ne’ebé tama iha kontradisaun iha hotu fatin ne’ebá, halo kedas akareasaun.
- Kuandu ema sira-ne’ebé tama iha kontradisaun la iha ne’ebá tenke marka loron atu halo akareasaun.
- Kuandu ema sira-ne’ebé tama iha kontradisaun fó sira nia depoimentu iha karta prekatória ba Tribunál ida de’it, Tribunál deprekadu maka halo akareasaun ne’e, salvu kuandu Juíz-da-kauza haruka ema sira-ne’e mai halo akareasaun iha nia oin, tetu tiha sakrifísiu ne’ebé dezlokasaun ne’e hamonu ba sira.
- Kuandu depoimentu tenke grava ka rejista, tenke rejista mos akareasaun nia rezultadu.
Ho nune’e, Arguidu JB husu Tribunál atu halo akareasaun atu Tribunál apura tan faktu balun tanba faktu ne’ebé mak Arguidu DS hato’o iha audiénsia julgamentu ne’e balun laloos no barak inventa de’it.
Arguidu BJ deklara ba Tribunál katak nesesáriu tebes atu halo akareasaun ne’e tanba atu konfirma faktu loos tanba nu’udar Komandante iha momentu ne’ebá halo nia funsaun hanesan Komanda nia membru, maibé membru sira mai deklara iha Tribunál katak nia maka rai kupong mina.
Nia haktuir, momentu Ministériu Públiku hamutuk ho Autoridade Seguransa ba Arguidu DS nia uma hetan kupong.
“Agora hateten dehan ha’u mak rai ne’e la’ós no tuir regra kupong ne’e rai iha serbisu fatin la’ós rai fali uma,” nia katak.
Hafoin rona tiha arguidu nia depoimentu, Tribunál koletivu aseita halo akareasaun ba arguidu BJ no DS hodi apura tan faktu balun, maibé tanba Arguidu DS iha hela Austrália hodi halo serbisu ne’ebé akareasaun ne’e sei halo via zoom.
Jornalista : Natalino Costa
Editora : Julia Chatarina
