Ofisiál Superiór PNTL ida suspeitadu halo agresaun fízika hasoru Filomena Soares
DILI, 12 Maiu 2026 (TATOLI)–Ofisiál Superiór Polísia Nasionál Timor-Leste (PNTL) ho inisiál JM, ho deviza Komisáriu Asistente halo agresaun fízika hasoru lezada Filomena Soares.
Kazu ne’e akontese iha loron 21 Abríl 2026 tuku 02:24 madrugada iha Aldeia Namanei, Suku Makadiki, Postu Administrativu Uatulari, Munisípiu Vikeke, kauza husi Ofisiál Superiór Polísia ne’e alegadamente duun lezada katak nia buan manas.
Oan husi Lezada Filomena Soares, Marciana Soares Amaral, haktuir, kronolojia husi kazu ne’e, iha 21 Abríl 2026, ho hakfodak nia rona lian husi li’ur ema lubuk ida hakilar dehan “tuda-tuda, karik nia halai”.
“Maibé ha’u hanoin sira duni animál ruma, tamba ha’u la sente buat ida no ha’u kontinua sona ha’u-nia dosi. Derrepente dei’t sira bolu ho lian maka’as, ‘Hoii… ferik o sai mai lai’, no ha’u kontinua hatan ba sira katak, ha’u sona hela ha’u-nia dosi, maibé sira hatan ho lian maka’as hodi obriga katak, o husik hela dosi, o tenki sai mai agora kedas, depois ha’u mós hakat sai husi dapur mai iha li’ur hetan kedas basa maka’as husi oknum PNTL ho inisiál JM no ofendida nia oin halai no monu kedas iha nia ain okos,” Marciana Soares, konta tuir liuhusi konferénsia imprensa ne’ebé hala’o iha Hera, Tersa ne’e.
Notísia relevante : PNTL detein suspeitu na’in-12 ba kazu “sobu” festa iha Hera Akanunu
Husi problema ne’e, lezada hato’o kedas keixa ba Eskuadra PNTL Uatulari, iha loron 23 Abríl 2026 iha tuku 08:00 dadeer.
“Komadante Eskuadra rasik konsola ha’u katak, kazu ne’e labele rezolve iha ne’e, maibé bá rezolve iha Aldeia ka tuir família no halo ha’u la satifaz ho Komandante Eskuadra nia liafuan sira ne’ebé hateten mai ha’u, ha’u responde kedas, tamba sá imi la hatán ha’u hato’o keixa no haruka ha’u tenke fila bá rezolve tuir kultura no tradisaun Timor nian, ka imi-nia Komandante mak defende malu,” nia akresenta.
Marciana husu ba Komadante Jerál PNTL, Komisáriu Afonso Dos Santos hodi foti medida rigorozu hasora Ofisiál Superiór PNTL, JM no nia eskoltu BS, tuir prosesu disiplinar PNTL nian ne’ebé Komandante Jerál rasik hateten sei la tolera membru ne’ebé liman kona povu.
Aleinde ne’e, Reprezentante família husu ba Ministériu Interiór no Komadante Jerál PNTL atu fó xamada urjente ba membru tamba halo defamasaun, abuzu poder, inklui ofensa integridade fízika simples tuir Kódigu Penál Timor-Leste.
Marciana mós husu ba Prezidente Repúblika, ba asuntu seguransa nian ne’ebé iha Gabinete ida ho naran Kaza Militár atu akompaña prosesu investigasaun imediata.
Família husu mós ba Tenente Jenerál FALINTIL-Forsa Defeza Timor-Leste (F-FDTL) atu hare asuntu ne’e ho sériu.
Husu mós ba Provedoria Direitu Umanu no Justisa (PDHJ) atu haree problema ne’e ho sériu tamba membru PNTL sempre uza agresaun físika ka troturasaun hasoru nia povu sira bainhira iha terrenu.
Marciana husu ba sosiedade sivil ein jeralmente atu apoiu solidariedade morál hodi defende interrese komum, liuliu ba aktu ne’ebé halo hasoru inan feto faluk.
“Ami husu ba Parlamentu Nasiónal, liuliu ba Komisaun B no Komisaun F atu akompaña prosesu ne’e bainhira rejistu ona iha Ministériu Públiku, liuliu ba Prezidente GMPTL (Grupo das Mulheres Parlamentares de Timor-Leste), Aliansa Araújo,” nia katak.
Família mós husu ba Rede Feto ne’ebé defende direitu feto atu hola parte iha prosesu investigasaun ne’e ho sériu bainhira prosesu ne’e sei la’o hela.
Marciana afirma, kazu ne’e sira rejeita atu rezolve tuir dalan família nia no sei avansa ba dalan legál.
Jornalista : Natalino Costa
Editora : Julia Chatarina
