DILI, 11 Maiu 2026(TATOLI)–Polísia Nasionál Timor-Leste (PNTL) detein ona autór na’in-12 liga ho kazu sobu iha festa ida iha área Akanunu, Aldeia Halidolar, Postu Admistratibvu Kristu Rei, Munisípiu Dili, iha Sábadu (09/05) foin lalais tuku 05:00 madrugada.
Suspeitu na’in -12 ne’ebé hetan detensaun kompostu iha sala AS, DS, SX, ACS, MM, NNR, JB, MS, NM, AS, S P no AR.
Akontesimentu ne’e rezulta sasán lubuk hanesan meza, kadeira, sounds system, spicker no seluk tan rahun iha festa laran.
Komandante PNTL Munisípiu Dili, Komisáriu Asistente Polísia Orlando Gomes, informa, kazu asaltu malu entre grupu rua ne’e rezulta ema na’in-rua hetan kanek kma’an, uma tolu hetan estragu, motor, kadera, meza, inklui mós ekipamentu múzika toka festa nian hanesan organ, kuluna no sasán seluk tan hetan estragu.
“Suspeitu ba kazu krime ne’e hamutuk na’in-12 mak daudaun detein ona iha sela detensaun Komandu PNTL Munisípiu Dili, oras 72 hafoin submete ba Ministériu Públiku hodi partisipa Primeira interrogatóriu iha Tribunál,” Orlando Gomes hateten ba Jornalista sira iha ninia knaar fatin, Komandu PNTL, Kaikoli, Segunda ne’e.
Notísia relevante : Asaun pasífiku hasoru PN, PNTL husu AMN respeita lei manifestasaun
Nia esplika, iha suspeitu na’in-12 mak deskobre ona no autór hirak ne’ebé seidauk hetan detensaun sei buka tuir sira-nia paradeiru.
Polísia investigadór submete ona ho prosesu flagrante delitu no rejista ho númeru NUK 146/26DIBCR.
“Polísia kontinua buka tuir nafatin autór hirak ne’ebé mak sobu ema-nia festa no autór hirak ne’ebé halo asaun krime hanesan estraga ema-nia sasán barak iha festa laran, Komandu PNTL sei bolu sira hodi asume responsabilidade ba hahalok ne’ebé sira halo,” nia katak.
Tuir Komisáriu Asistente, autór sira-nia asaun brutál ne’e halo komunidade pániku, tanba ne’e Polísia sei la tolera no sei halo operasaun hodi kaer hotu ema ne’ebé envolve.
“Prosesu ne’e kontinua la’o no investigasaun mós kontinua atubele buka tan ema sira ne’ebé mak envolve iha laran. Maibé suspeitu na’in-12 ne’ebé iha ona sela detensaun aban ita sei aprezenta ba Tribunál,” nia relata.
Komisáriu Asistente Polísia Orlando Gomes orienta ona ba Eskuadra Kristu Rei hodi bolu Xefe Suku no Administradór Postu sira atu hamutuk haree situasaun ne’e. Tanba asaun krime ne’ebé akontese iha Akanunu Hera ne’e rezulta komunidade balun kanek, nune’e vítima sira evakua hotu bá ospitál hodi hetan tratamentu intensivu.
“Ba kazu ne’e, Polísia kontinua mantein halo operasaun ba área Akanu Hera, kazu referidu hakarak ka lakohi tenke ba oin,” nia afirma.
Jornalista : Natalino Costa
Editora : Julia Chatarina
