DILI, 17 novembru 2020 (TATOLI)-Iha outubru, tinan ne’e, Tribunál Distritál Dili (TDD) realiza julgamentu movel ba atende kazu hamutuk 48 iha Munisípiu Liquiça.
“Kazu 48 ne’ebé (decidido) ka iha ona desizaun, maibé iha kazu ida mak seidauk iha desizaun tanba durante julgamentu arguidu ida la marka prezensa,” Juis Administradór TDD, Afonso Carmona, informa ba jornalista, ohin, iha nia kna’ar fatin, Mandarin, Dili.
Kazu sira ne’ebé Tribunál halo julgamentu hanesan violénsia doméstika, violasaun seksuál, ofensa korporais, omisídiu no sira seluk. Hosi kazu-sira ne’e balun iha desizaun Tribunál nian kondena no absolve.
Afonso Carmona, hateten, julgamentu movel iha programa rua mak importante hanesan halo divulgasaun lei penál, sivíl ba sidadaun sira no parte seluk atu lori justisa hakbesik liután ba populasaun vulneravel no susar asesu transporte.
TDD mós daudaun identifika hela númeru prosesu krime ne’ebé akontese iha area jurizdisaun Aileu, Ermera no Atauro, inklui Dili rasik hanesan iha area Tasi-tolu no Becora hodi bele realiza mós julgamentu movel.
Jornalista: Nelson de Sousa
Editór: Francisco Simões
