VIKEKE, 02 Juñu 2026 (TATOLI)—Xefe Departamentu Peska Munisípiu Vikeke, Bendito Trindade, informa daudaun ne’e Sentru Viveiru ikan Loihunu lokaliza iha Suku Loihunu, Postu Ossú prosesa kolleta ikan nila ba konsumidór sira iha Munisípiu Vikeke.
“Ami hahú kolleta ikan nila iha Sentru Viveiru Loihunu iha Sábadu semana kotuk (30/05/2026) no agora ami kontinua prosesu kolleta ikan hodi fa’an ba ita-nia konsumidór sira maioria husi Munisípiu Vikeke mak sosa hodi konsume. Entaun, prosesu ida-ne’e kolleta hotu ami sei hatama fali ikan oan iha kolam sira,” Bendito Trindade ba TATOLI iha Loihunu, Tersa ne’e.
Notísia relevante: Tempu badak, Sentru Viveiru Loihunu kolleta ikan nila tonelada rua
Nia dehan daudaun ne’e sosa ikan ne’e maioria komunidade Vikeke mak bá direta sosa no presu ikan ne’e kada kilo ho presu $3.50.
Bendito kompara kolleta tinan ida-ne’e foin kolleta kolam rua de’it ikan barak ona, duké tinan kotuk.
Tuir dadus, kolleta daudaun ne’e hamutuk kilógrama 463 ho totál orsamentu hamutuk $1.620,5.
Jornalista: Vitorino Lopes da Costa
Editór: Xisto Freitas da Piedade
