DILI, 08 fevereiru 2022 (TATOLI)—Parlamentu Nasionál, tersa ne’e liu hosi diskusaun plenária aprova proposta lei númeru 34/V(3a) Komisaun Funsaun Públika iha jeneralidade.
Notisia Relevante: PN baixa proposta-lei Komisaun Funsaun Públika ba Komisaun A
“Rezultadu votasaun a-favór 32, kontra neen (6) no abstensaun ida (1), nune’e proposta lei Komisaun Funsaun Públika aprova iha jeneralidade. Ho nune’e, plénaria haruka proposta lei foun ne’e ba komisaun A trata asuntu Justisa no Konstituisionál hodi trata iha espesialidade,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária, Parlamentu Nasionál.
Proposta lei (PPL) ne’e iha artigu hamutuk 25 no kapítulu tolu. Kapítulu I kona-ba Dispozisaun Jerál ho nia artigu rua, Kapítulu II kona-ba Komisaun Funsaun Públika ho nia artigu 19 no Kapítulu III kona-ba Dispozisaun Finál ho nia artigu haat.
PPL ho objetu prezente lei estabelese rejime jurídiku aplika promosaun imparsialidade, isensaun no profisionlizmu funsaun públika hosi Komisaun Funsaun Publika (KFP), dezigna mós hosi komisaun. Kona-ba natureza, kompeténsia, organizasaun no funsionamentu KFP define hosi dekretu-lei.
Iha ambitu aplikasaun sujeita ba rejime jurídiku previstu iha prezente lei relasaun jurídika ba funsionáiu públiku, ajente no traballadór administrasaun públika sujeitu ba estatutu funsaun públika aprova hosi lei númeru 8/2004, 16 juñu, altera hosi lei númeru 5/2009, 15 jullu, independentemente vinkula servisu ho Estadu.
Deputadu Joaquim dos Santos Amaral hateten, bainhira proposta lei ne’e iha ona aprovasaun finál mak sei revoga hotu lei númeru 7/2009, 15 jullu, ne’ebé kria Komisaun Funsaun Públika, maibé deputadu komisaun A sei halo diskusaun materia kle’an kada artigu iha faze espesialidade.
Ministru Prezidensia Konsellu Ministru (PCM, siglá protugés), Fidelis Manuel Leite Mangalhães, hateten inisitiva proposta ne’e hodi garante objetivu rua hanesan regra substantiva depedensia no imparsialidade iha funsionamentu administrasaun públika.
“Proposta lei kona-ba Komisaun Funsaun Públika ne’e esklarese nia atribuisaun KFP no kompeténsia órgaun, tanba daudaun ne’e iha lei vijente la konsege esklarese didi’ak atribuisaun KFP,” nia esplika.
Fidelis hateten, odjetivu seluk mak hakarak reforsa kompeténsia Komisaun Funsaun Públika (KFP) garante iha matéria regulatória, kontrola legalidade, m’eritu no funsaun hanesan entidade indepedente.
Notísia Relevante: Komisaun A haruka ona paresér proposta lei Funsaun Públika ba PPN
Jornalista : Nelson de Sousa
Editór : Cancio Ximenes
