DILI, 27 abríl 2022 (TATOLI)-Prezidente Komisaun Reguladora Arte Marsiál (KRAM), Octavio da Conceição, hateten Governu liuhosi Ministériu Justisa (MJ), legaliza ona atividade grupu arte marsiál Kmanek Oan Rai-Klaran (KORK), Persaudaraan Setia Hati Terate (PSHT) no Ikatan Kera Sakti (IKS).
“Organizasaun tolu ne’e iha ona legalidade para atu bele hala’o ona sira-nian atividade prátika treinamentu ka formasaun sira iha Timor-Leste tomak,” nia hateten iha konferénsia imprensa ne’ebé hala’o iha SEJD Dili, kuarta ne’e.
Notísia Relevante :KM Aprova Rezolusaun Reativa Arte-Marsiál
Octavio reforsa Sekretáriu Estadu Juventude no Desportu (SEJD), Abrão Saldanha, mós aprova ona legalidade ne’e hodi públika ona iha jornál repúblika, iha loron kuarta, (26 abríl 2022).
“Komesa iha horseik públika sai iha jornal repúblika, segunda diretiva ba autorizasaun instrusaun no prosedimentu formasaun ba atividade arte marsiál, organizasaun PSHT, KORK no IKS, iha ona legalidade, iha lejitimaidade para sira bele halo sira-nian atividade formasaun, iha fatin públiku iha eskola sira, iha fatin sira ne’ebe iha prátika arte marsiais iha iha teritóriu nasionál,” Octavio da Conceição hateten.
Atu evita mosu konflitu iha rai-laran, nia apela ba organizasaun arte marsiál ne’ebé hamahan aan iha Federasaun Silat Timor-Leste (FESTIL) atu kumpre regulamentu no lei ne’ebé vigór.
Nune’e mós husu atu hametin kooperasaun no koordenasaun ho entidade Estadu nian, liliu Polisia Nasionál Timor-Leste iha Munísipiu, Autoridade Munísipal, Autoridade komunitária hodi asegura páz no estabilidade iha rai-laran.
Atu regula GAM tolu ne’e maka iha loron 26 fulan-abríl Komisaun Reguladora Arte Marsiál (KRAM), entrega ona prosedimentu no regulamentu ba lidér arte marsiál tolu ne’e hodi kumpre.
“Horseik ami entega ona prosedimentu regilamentu ba dirijenta organizasaun arte marsiál IKS, PSHT no KORK nune’e sira bele hamutuk hodi ko’alia kona-ba matadalan ne’ebé KRAM fó sai, atu nune’e iha infrasaun ruma ne’ebé komete hosi membru organizasaun arte marsiál oinsá maka dirijente sira bele foti medida disipliña tuir matadalan ne’e rasik,” dehan Nia.
Rezolusaun Governu númeru 4/2020, 2 marsu, ne’ebé revoga tiha rezolusaun númeru 16/2013 hodi fó informasaun ba GAM tolu hanesan, Persaudaraan Setia Hati Terate (PSHT), Ikatan Kera Sakti (IKS) Timor-Leste ho Kmanek Oan Rai Klaran (KORK) bele kumpre regra sira-ne’e.
Grupu Armte marsiál tolu ne’e, presiza kumpre kritériu rejistu 18 hanesan, 1), Estatutu federasaun/organizasaun ho lian Tetun no Portugés ne’ebé aprova iha asembleia jerál, 2), Akta kongresu federasaun ka organizasaun, 3), Estatutu Federasaun/Organizasaun, kartaun identidade (BI, Kartaun Eleitorál no dokumentu relevante), 4), Patrimóniu organizasaun.
5), Atributu no materiál ne’ebé utiliza hodi pratikante arte marsiál uza durante iha fatin treinu, 6) Mapa lokalizasaun treinu no fatin eskritóriu, 7), Fundadór mínimu ema na’in-10 kompleta ho kartaun (BI, Kartaun Eleitorál no dokumentu relevante), 8) Boom komportamentu treinadór ba sentru, klube no eskola ne’ebé destinu ba pratika arte marsiál, 9), Atestadu médiku treinadór.
10), Karta autorizasaun husi xefe suku no na’in ba rai (ba fatin treinamentu no fatin eskritóriu), 11), Nivel sertifikadu, 12), Foto treinadór, 13), totál membru tenke na’in-50 kada sentru, klube ka eskola, 14), Baze de dadus husi membru hotu no nia responsavel iha munisípiu 12 inklui REAO, 15), Karta afiliasaun husi federasaun/organizasaun internasionál (ba organizasaun ne’ebé mai husi estranjeiru).
16), Deklarasaun husi sentru, klube ka eskola atu la afilia ba partidu polítika, 17), Deklarasaun la iha konflitu internal no externa organizasaun no 18), karta rekomendasaun husi FESTIL (ba organizasaun ne’ebé hamahon aan iha FESTIL).
Notísia Relevante :KRAM sensibiliza polítika reativa GAM iha RAEOA
Jornalista : Natalino Costa
Editór : Agapito dos Santos
