DILI, 05 Juñu 2026 (TATOLI) – Vise-Ministru ba Fortalesimentu Institusionál, Paulo Manuel da S. dos Remédios, hateten insiativa Parlamentu Nasionál atu halo alterasaun ba Kódigu Penál hodi kriminaliza difamasaun sei la fó impaktu ba liberdade imprensa iha Timor-Leste.
Nia dehan, iha projetu lei ne’e laiha artigu ida refere ba kriminaliza produtu jornalístiku ka imprensa nian. Tanba parte ida ne’e halo lejizlasaun seluk la’ós ida-ne’e.
“Ha’u nia opiniaun, ne’e la impaktu ba liberdade imprensa, artigu ida ne’ebé ita simu proposta Parlamentu la envolve imprensa ka jornalista ou komentáriu husi jornál. Kalma, asegura iha-ne’eba, iha lei ida-ne’e proposta laiha kriminalizasaun ba aktu jornalista ou mídia sira”, nia hateten hafoin partisipa audiénsia públika ba Projetu Lei ne’e iha Parlamentu, sesta ne’e.
Komisaun A ne’ebé trata Asuntu Konstituisionál, ohin kontinua halo audénsia públika hodi rona opiniaun husi Ministériu Justisa (MJ), Ministériu Interiór (MI), Polísia Sientífika Investigasaun
Kriminál (PCIC, sigla portugés) ba projetu lei númeru 17/VI terseira kona-ba alterasaun Kódigu Penál.
Governante ne’e, hateten audiénsia ne’e ko’alia intensaun projetu lei Parlamentu nian maibé sei ko’alia detalla iha diskusaun faze espesialidade no parte Governu sujere atu mellora liután iha mateira alterasaun iha diskusaun tuir.
Notísia relevante: LH konsidera inisiativa kriminaliza difamasaun ameasa sériu ba liberdade espresaun, demokrasia no direitu umanu
Jornalista: Nelson de Sousa
Editór: Evaristo Soares Martins
