DILI, 08 Juñu 2026 (TATOLI) – Meza Parlamentu Nasionál, liuhusi reuniaun plenária, segunda ne’e, halo anúnsiu admisaun no baixa ba Komisaun C ne’ebé Trata Asuntu Finansa Públika ba proposta Lei númeru 30/VI (3ª) – Alterasaun dahuluk ba Lei númeru 13/2011, loron 28 fulan-Setembru, kona-ba Rejime Dívida Públika.
Prezidente Parlamentu Nasionál, Maria Fernanda Lay, husu komisaun atu inísia prosesu tuir mai inisiativa lejizlativa ne’e.
Ho ida-ne’e Komisaun sei elabora kalendáriu ba audiénsia públika ho Governu no instituisaun relevante sira, hodi prepara relatóriu no pareser hodi aprezenta iha plenáriu antes diskusaun iha faze jeneralidade nian.
Lembra iha 22 Abríl 2026, Governu liuhusi reuniaun Konsellu Ministru, aprova projetu proposta-lei, ne’ebé aprezenta husi Mimistra Finansa, Santina Cardoso, ba alterasaun dahuluk ba Lei númeru 13/2011, loron 28 fulan-Setembru, kona-ba Rejime Dívida Públika.
Proposta ne’e permite habelar tan ámbitu emisaun dívida públika nian, hodi la limita de’it ba finansiamentu infraestrutura estratéjika, atu nune’e bele permite uza instrumentu hanesan títulu tezouru hodi finansia despeza jerál Estadu nian.
Jornalista : Nelson de Sousa
Editór : Evaristo Soares Martins
