DILI, 08 jullu 2022 (TATOLI)–Primeiru-Ministru (PM), Taur Matan Ruak, hato’o profunda sentidu kondolénsia ba família matebian eis Primeiru-Ministru Japaun, Shinzo Abe, ne’ebé hakotu-iis, iha sesta ne’e.
Shinzo Abe hetan tiru hosi ema deskoñesidu bainhira hato’o hela diskursu polítika hosi Partidu Demokátiku Liberál, durante kampaña ba eleisaun parlamentár, iha sidade Nara, Japaun, sesta meiudia.
“Triste no xokadu ho notísia a’at kona-ba falesimentu eis Primeiru-Ministru Japaun Shinzo Abe nian, ne’ebé hetan tiru ohin iha sidade Nara, Japaun bainhira nia hala’o hela kampaña,” Xefe Governu hato’o sentimentu triste liuhosi nota imprensa ne’ebé Agência Tatoli asesu, hosi Gabinete PM.
Notísia relevante: Japaun kompromete apoia Timor-Leste iha área protesaun marítima
Biban hanesan, Xefe Ezekutivu hato’o solidariedade ba povu no Governu Japaun ba insidente horrível ida-ne’e.
“Ohin loron triste ba Ázia Pasífiku,” Taur akresenta.
Primeiru-Ministru, Taur Matan Ruak, momentu hanesan Xefe Estadu, hala’o vizita Estadu ba Japaun iha loron 15 marsu 2016, ne’ebé iha momentu ne’ebá hasoru malu mós ho Primeiru-Minstru japonéz, Shinzo Abe.
Shinzo Abe moris iha sidade Shinjuku, Tókiu, Japaun iha loron 21 setembru 1954 (tinan 67), eleitu sai Primeiru-Ministru Japaun iha tinan 2006 to’o 2007 no re-eleitu hosi tinan 2012 to’o 2020.
Jornalista : Antónia Gusmão
Editora : Julia Chatarina
