BOBONARU, 02 Jullu 2026 (TATOLI) – Programa Nasionál Dezenvolvimentu Suku (PNDS) tinan 2026 reabilita estrada iha aldeia Korluli, suku Ritabou, postu administrativu Maliana, munisípiu Bobonaru, tanba obra ne’e konsidera hanesan resposta ba pedidu komunidade ne’ebé hein durante tinan barak.
Rezidente Korluli, Manuel Alfredo, dehan katak estrada ne’e importante tebes tanba fasilita asesu komunidade nian bá estrada prinsipál ne’ebé taka ona ho alkatraun.
Nia hateten katak antes ne’e komunidade hasoru difikuldade boot, liuliu iha tempu udan, tanba estrada sai rai-rahun no difisil atu liu. Ho reabilitasaun estrada ne’e, komunidade espera mobilidade no asesu bá servisu báziku sira sei di’ak liután.
Notísia relevante: Bobonaru lansa projetu PNDS 56 no konstrusaun sala refeitóriu 19
“Komunidade sente orgullu ho programa PNDS. Ami tinan barak atu hetan estrada ne’e, ami-nia mehi ne’e to’o ona nia rohan, tanba agora implementa hela. Estrada ne’e asesu bá estrada boot ne’ebé tau ona alkatraun. Durante ne’e ita halerik ho tahu iha tempu uda no tempu bailoro rai-rahun maka’as, entaun PNDS tama, ita bele dehan liberdade ne’e mak ida-ne’e ona”, nia hato’o.
Aleinde ne’e, reprezentante veteranu iha aldeia Korluli, João Baptista Ferreira “Taroman”, mós hato’o ni apresiasaun ba goGvernu liuhosi programa PNDS.
“Iha tempu okupasaun Indonezia, área ida-ne’e la hetan atensaun. Foin mak Governu tama. Ami nu’udar veteranu haksolok tebes ho programa ida-ne’e. Povu hotu-hotu entuziasmu no serbisu hamutuk atu estrada ne’e remata lalais, hodi apoia dezenvolvimentu iha ami-nia aldeia”, dehan.
Projetu reabilitasaun estrada Korluli ne’e ho distánsia metru 600 ho orsamentu hamutuk $36.388,06 no previstu remata iha durasaun fulan haat.
Programa PNDS kontinua sai hanesan instrumentu importante Governu nian atu hadi’a infraestrutura bázika no promove dezenvolvimentu iha área rurál sira iha Timor-Leste.
Notísia relevante: Orsamentu PNDS 2026 iha Bobonaru aloka ba obra 50 no projetu adisionál 18
Jornalista: Sergio da Cruz
Editora: Maria Auxiliadora
