BOBONARU, 27 Janeiru 2026 (TATOLI) – Orsamentu ba Programa Nasionál Dezenvolvimentu Suku (PNDS) tinan 2026 ba munisípiu Bobonaru hamutuk $1.817.330, hodi ezekuta ba obra regulár 50 iha kada suku, inklui projetu adisionál 18 ho montante rihun $300.
Diretór PNDS munisípiu Bobonaru, Rosário Mali, dehan fundu adisionál ne’e hodi konstrui refeitóriu ba Programa Merenda Eskolar iha eskola 18, ne’ebé sei estabelese iha postu administrativu Atabae sala rua, Balibó, Lolotoe, Maliana kada sala tolu, postu Bobonaru lima no Kailaku rua.
“Ita-nia programa PNDS regulár 2026 ne’e ita iha projetu 50, kada suku projetu ida”, nia informa ba jornalista sira, ohin.
Antes implementa obra ne’e, iha fulan-Fevreiru ekipa PNDS munisípiu Bobonaru sei halo sosializasaun kona-ba matadalan programa ne’e iha nivel munisipál ba Administradór Postu Administrativu neen, xefe suku 50 no diretór sira.
Sei halo mó sosializasaun iha nivel suku hodi esplika lala’ok no matadalan implementasaun PNDS. “Ne’e partisipa husi inan-aman sira iha suku, nune’e komprende didi’ak no sira tenke koopera iha programa PNDS, nune’e implementa tuir tempu ne’ebé determina”, dehan.
Rosário Mali mós esklarese katak iha orsamentu tinan ne’e sei kontinua mós obra carry over 12 ne’ebé la konsege finaliza iha tinan 2024.
“Ami bá diskute ona iha Konsellu Konsultivu Munisipál no foti desizaun katak projetu sira ne’e seidauk finaliza, ita sei lori orsamentu tinan ida-ne’e ba finaliza no karik iha balansu mak ita foin kontinua sira-nia prioridade tinan ida-ne’e nia”, nia hato’o.
Iha implementasaun obra PNDS tinan 2025 iha suku 50 maioria finaliza ona ho nia progresu ezekusaun 97%, hosi totál alokasaun anuál $1.817.330 no balansu husi ezekusaun ho montante $55.332,26 (3%) fila ba kofre Estadu.
Ezekusaun Orsamentu ba Infraestrutura nia atinje 97% no Operasionál 96%, husi númeru ne’e balansu ne’e husi Infraestrutura nia $48.699,48 (3%) no Operasionál $6.577,20 (4%).
Projetu 50 ne’e klasifika ba obra públika hanesan dalan, ponte no kontrolu seia hamutuk 35, bee-moos neen, saúde haat no setór edukasaun lima.
Notísia relevante: MOP promete rezolve kondisaun estrada iha suku Leber
Jornalista: Sergio da Cruz
Editora: Maria Auxiliadora
